meri nazar mein dosto jis shahr ke gulzar hain

merī nazar meñ dosto jis shahr ke gulzār haiñ

sabza baḌā sarkash hai vaañ aur sard ḳhush-raftār haiñ

shāḳheñ haiñ vaañ ārāsta aur gul haiñ vaañ nau-ḳhāsta

pyāle haiñ jin ke madh-bhare aur pairahan zar-kār haiñ

har har qadam par ḳhūb-rū ārām-e-jāñ aur kām-jū

āñkhoñ meñ ġhunchoñ kī chaTak chehre ġhazab gulnār haiñ

jitne ye kam-āmez haiñ itne hī shauq-añgez haiñ

zāhir meñ jitne saḳht haiñ itne hī kam-āzār haiñ

un kī nigah kā sā.iqa kartā hai kār-e-lā.iqā

chakkheñ jo us kā zā.iqa sātoñ samundar paar haiñ

harf-e-ġhalat dīn-e-kuhan saare hijābāt-e-badan

āzād haiñ sab mard-o-zan sab aadmī sab yaar haiñ

jaage hue haiñ mai-kade har kufr-o-īmāñ se pare

bikhrī huī tasbīh hai TuuTe hue zunnār haiñ

meri nazar mein dosto jis shahr ke gulzar hain

sabza baDa sarkash hai wan aur sard KHush-raftar hain

shaKHen hain wan aarasta aur gul hain wan nau-KHasta

pyale hain jin ke madh-bhare aur pairahan zar-kar hain

har har qadam par KHub-ru aaram-e-jaan aur kaam-ju

aankhon mein ghunchon ki chaTak chehre ghazab gulnar hain

jitne ye kam-amez hain itne hi shauq-angez hain

zahir mein jitne saKHt hain itne hi kam-azar hain

un ki nigah ka saiqa karta hai kar-e-laiqa

chakkhen jo us ka zaiqa saton samundar par hain

harf-e-ghalat din-e-kuhan sare hijabaat-e-badan

aazad hain sab mard-o-zan sab aadmi sab yar hain

jage hue hain mai-kade har kufr-o-iman se pare

bikhri hui tasbih hai TuTe hue zunnar hain