meri nazar nazar mein hain manzar jale hue

merī nazar nazar meñ haiñ manzar jale hue

ubhreñge harf harf se paikar jale hue

sho.aloñ kā raqs āb-e-ravāñ tak pahuñch gayā

dariyā pe bah ke aa.e haiñ chhappar jale hue

har zarra is zamīn kā lau de rahā hai aaj

kal aap ko mileñge samundar jale hue

mazlūm-o-be-qusūr jinheñ kah rahe haiñ aap

nikle haiñ un ke ghar se bhī ḳhanjar jale hue

āñkhoñ kī is jalan se nā mil pā.egī najāt

dekhe haiñ merī āñkhoñ ne manzar jale hue

Darne lage haiñ aag se ātish-parast bhī

dekhe haiñ jab se chāroñ taraf sar jale hue

be-ḳhvāb vahshatoñ ko sulāne ke vāste

ārāsta haiñ aaj bhī bistar jale hue

meri nazar nazar mein hain manzar jale hue

ubhrenge harf harf se paikar jale hue

shoalon ka raqs aab-e-rawan tak pahunch gaya

dariya pe bah ke aae hain chhappar jale hue

har zarra is zamin ka lau de raha hai aaj

kal aap ko milenge samundar jale hue

mazlum-o-be-qusur jinhen kah rahe hain aap

nikle hain un ke ghar se bhi KHanjar jale hue

aankhon ki is jalan se na mil paegi najat

dekhe hain meri aankhon ne manzar jale hue

Darne lage hain aag se aatish-parast bhi

dekhe hain jab se chaaron taraf sar jale hue

be-KHwab wahshaton ko sulane ke waste

aarasta hain aaj bhi bistar jale hue