meri ragon mein bahte lahu ke andar the

merī ragoñ meñ bahte lahū ke andar the

merī ḳhaak meñ shāmil jitne jauhar the

sakte meñ the dekh ke un ko vasl-o-firāq

jāgtī āñkhoñ meñ kuchh aise bistar the

merī nok-e-qalam se zāhir ho na sake

merī ruuh ke andar jaise manzar the

jis bastī se ham ne kaasa bhar laayā

us bastī meñ sab miskīnoñ ke ghar the

saarī rutoñ meñ ḳhuun hamārā bahtā thā

saare mausam dekh ke ham ko shashdar the

terī duniyā tū jaane duniyā jaane

ham kyā jāneñ ham to mast qalandar the

dīvāne ko tere kaafī kyā hote

ḳhalq-e-ḳhudā ke haath meñ kitne patthar the

tere gagan kī surḳhī ban kar bahte haiñ

merī āñkhoñ meñ to surḳh samundar the

raam kiyā hai un ko kam-kam logoñ ne

vo jazbe jo ḳhud-sar the jo be-sar the

dho Daalā hai ham ko ujle sāgar ne

ham bhī 'vasfī' kal tak mailī chādar the

meri ragon mein bahte lahu ke andar the

meri KHak mein shamil jitne jauhar the

sakte mein the dekh ke un ko wasl-o-firaq

jagti aankhon mein kuchh aise bistar the

meri nok-e-qalam se zahir ho na sake

meri ruh ke andar jaise manzar the

jis basti se hum ne kasa bhar laya

us basti mein sab miskinon ke ghar the

sari ruton mein KHun hamara bahta tha

sare mausam dekh ke hum ko shashdar the

teri duniya tu jaane duniya jaane

hum kya jaanen hum to mast qalandar the

diwane ko tere kafi kya hote

KHalq-e-KHuda ke hath mein kitne patthar the

tere gagan ki surKHi ban kar bahte hain

meri aankhon mein to surKH samundar the

ram kiya hai un ko kam-kam logon ne

wo jazbe jo KHud-sar the jo be-sar the

dho Dala hai hum ko ujle sagar ne

hum bhi 'wasfi' kal tak maili chadar the