meri sanso mein ru-ba-ru ho ja

merī sāñso meñ rū-ba-rū ho jā

mere jiine kī aarzū ho jā

har taraf tū hī tū dikhā.ī de

har taraf sirf tū hī tū ho jā

ek duuje ke donoñ ho jaa.eñ

maiñ tirī aur merā tū ho jā

ḳhud ko dekhūñ to tujh ko pā jā.ūñ

aa.ina ban ke chār-sū ho jā

jo abhī tak na ho sakā koī

mere mahbūb vo hī tū ho jā

jaañ se baḌh kar aziiz hai mujh ko

merī ulfat kī aabrū ho jā

ḳhushbuoñ kī tarah mahak uTTho

mere gulshan kī rang-o-bū ho jā

is se pahle maiñ ḳhatm ho jā.ūñ

ai merī zindagī shurūa ho jā

merī ḳhāmoshiyāñ pighal jaa.eñ

vo mohabbat kī guftugū ho jā

bārgāh-e-sanam meñ jaanā hai

ai 'kiran' tū bhī bā-vazū ho jā

meri sanso mein ru-ba-ru ho ja

mere jine ki aarzu ho ja

har taraf tu hi tu dikhai de

har taraf sirf tu hi tu ho ja

ek duje ke donon ho jaen

main teri aur mera tu ho ja

KHud ko dekhun to tujh ko pa jaun

aaina ban ke chaar-su ho ja

jo abhi tak na ho saka koi

mere mahbub wo hi tu ho ja

jaan se baDh kar aziz hai mujh ko

meri ulfat ki aabru ho ja

KHushbuon ki tarah mahak uTTho

mere gulshan ki rang-o-bu ho ja

is se pahle main KHatm ho jaun

ai meri zindagi shurua ho ja

meri KHamoshiyan pighal jaen

wo mohabbat ki guftugu ho ja

bargah-e-sanam mein jaana hai

ai 'kiran' tu bhi ba-wazu ho ja