meri shohrat na tabiat na Thikana achchha

merī shohrat na tabī'at na Thikāna achchhā

mere baare meñ use kuchh na batānā achchhā

paar to mujh ko du'ā.eñ bhī lagā saktī haiñ

maiñ samajhtā huuñ magar tair ke jaanā achchhā

ghar to kachche the magar log bahut pakke the

ab bhī lagtā hai vahī daur purānā achchhā

'ahd-e-rafta se mirī jaan chhuḌāne vaale

dām-e-fardā meñ nahīñ mujh ko phañsānā achchhā

vahī bohtān purāne vahī ilzām qadīm

dosto tum to mujhe do koī tā'na achchhā

chhūt kī tarah udāsī mirī lag jaatī hai

tum bahut ḳhush ho kabhī paas na aanā achchhā

mere kāñdhe se ye bandūq haTā le is baar

ab lagā phir se mire yaar nishāna achchhā

kaun sā is kā asar hogā mirī hālat par

laakh ho merī balā se ye zamāna achchhā

chup rahā maiñ to ghuTan aur baḌhegī 'tāsif'

varna lagtā hai kise shor machānā achchhā

meri shohrat na tabi'at na Thikana achchha

mere bare mein use kuchh na batana achchha

par to mujh ko du'aen bhi laga sakti hain

main samajhta hun magar tair ke jaana achchha

ghar to kachche the magar log bahut pakke the

ab bhi lagta hai wahi daur purana achchha

'ahd-e-rafta se meri jaan chhuDane wale

dam-e-farda mein nahin mujh ko phansana achchha

wahi bohtan purane wahi ilzam qadim

dosto tum to mujhe do koi ta'na achchha

chhut ki tarah udasi meri lag jati hai

tum bahut KHush ho kabhi pas na aana achchha

mere kandhe se ye banduq haTa le is bar

ab laga phir se mere yar nishana achchha

kaun sa is ka asar hoga meri haalat par

lakh ho meri bala se ye zamana achchha

chup raha main to ghuTan aur baDhegi 'tasif'

warna lagta hai kise shor machana achchha