mir-e-majlis-e-rindan aaj wo sharabi hai

mīr-e-majlis-e-rindāñ aaj vo sharābī hai

ḳhūn-e-dil jise merā bada-e-gulābī hai

dil ko saḳht betābī chashm ko be-ḳhvābī hai

hijr meñ tire zālim ye ye kuchh ḳharābī hai

aish chāhiye jo kuchh so to aaj hai maujūd

jaam o mai hai saaqī hai sair-e-māhtābī hai

sub.h hone de Tuk tū raat hai abhī baaqī

tujh ko ghar ke jaane kī aisī kyā shitābī hai

ham haiñ aur tum ho yaañ ġhair to nahīñ koī

aa gale se lag jaao vaqt-e-be-hijābī hai

tere ai parī-paikar siine par nahīñ pistāñ

tāq-e-husn par goyā shīsha-e-habābī hai

kyuuñ na bazm meñ 'bedār' hove qābil-e-tahsīñ

har yak is ġhazal ke biich sher intiḳhābī hai

mir-e-majlis-e-rindan aaj wo sharabi hai

KHun-e-dil jise mera bada-e-gulabi hai

dil ko saKHt betabi chashm ko be-KHwabi hai

hijr mein tere zalim ye ye kuchh KHarabi hai

aish chahiye jo kuchh so to aaj hai maujud

jam o mai hai saqi hai sair-e-mahtabi hai

subh hone de Tuk tu raat hai abhi baqi

tujh ko ghar ke jaane ki aisi kya shitabi hai

hum hain aur tum ho yan ghair to nahin koi

aa gale se lag jao waqt-e-be-hijabi hai

tere ai pari-paikar sine par nahin pistan

taq-e-husn par goya shisha-e-hababi hai

kyun na bazm mein 'bedar' howe qabil-e-tahsin

har yak is ghazal ke bich sher intiKHabi hai