mir ki tarh jo diwana nahin ho sakta

'mīr' kī tarh jo dīvāna nahīñ ho saktā

us kā ik lafz bhī bā-mā'nā nahīñ ho saktā

zindagī tere ta'āqub meñ vahāñ aa pahuñche

lauT kar ab kabhī ghar jaanā nahīñ ho saktā

maañ sī hastī ke kaleje ko jalāne vaale

tujh se hargiz mirā yārāna nahīñ ho saktā

bevafā.ī pe nadāmat se sisakte rahiye

sau janam ronā bhī harjāna nahīñ ho saktā

jaane kis karb meñ ashkoñ se sharābī ne likhā

ḳhāna-e-bāda davā-ḳhāna nahīñ ho saktā

mujh ko qur.ān sunā 'mīr' kī ġhazleñ na sunā

koī jugnū mirā paimāna nahīñ ho saktā

kāġhazī sham' pe sāñsoñ ko luTā de 'tāhir'

itnā nādān to parvāna nahīñ ho saktā

'mir' ki tarh jo diwana nahin ho sakta

us ka ek lafz bhi ba-ma'na nahin ho sakta

zindagi tere ta'aqub mein wahan aa pahunche

lauT kar ab kabhi ghar jaana nahin ho sakta

man si hasti ke kaleje ko jalane wale

tujh se hargiz mera yarana nahin ho sakta

bewafai pe nadamat se sisakte rahiye

sau janam rona bhi harjaana nahin ho sakta

jaane kis karb mein ashkon se sharabi ne likha

KHana-e-baada dawa-KHana nahin ho sakta

mujh ko quran suna 'mir' ki ghazlen na suna

koi jugnu mera paimana nahin ho sakta

kaghazi sham' pe sanson ko luTa de 'tahir'

itna nadan to parwana nahin ho sakta