mil jaegi duniya mein hi jannat use kahna

mil jā.egī duniyā meñ hī jannat use kahnā

kartā rahe māñ-bāp kī ḳhidmat use kahnā

itnī sī kare ham pe 'ināyat use kahnā

laa.e na mohabbat meñ siyāsat use kahnā

vo saath rahe par hameñ 'ādat na banā.e

hotī hai burī chiiz ye 'ādat use kahnā

kuchh roz kā mehmān hai dīvāna tumhārā

ab Thiik nahīñ rahtī tabī'at use kahnā

jo faisla karnā hai vo ham ghar meñ kareñge

jaa.e na mirā bhaa.ī 'adālat use kahnā

dushvār hai milnā to koī baat nahīñ hai

lekin vo hameñ likhtā rahe ḳhat use kahnā

kahnā ki use aaj bhī ham yaad kare haiñ

hai ab bhī hameñ us se mohabbat use kahnā

bas pyaar se ik baar mirā naam pukāre

jab bhī ho use merī zarūrat use kahnā

le jā.egā hamrāh meñ ā'māl vo apne

rah jā.egī duniyā meñ hī daulat use kahnā

mil jaegi duniya mein hi jannat use kahna

karta rahe man-bap ki KHidmat use kahna

itni si kare hum pe 'inayat use kahna

lae na mohabbat mein siyasat use kahna

wo sath rahe par hamein 'adat na banae

hoti hai buri chiz ye 'adat use kahna

kuchh roz ka mehman hai diwana tumhaara

ab Thik nahin rahti tabi'at use kahna

jo faisla karna hai wo hum ghar mein karenge

jae na mera bhai 'adalat use kahna

dushwar hai milna to koi baat nahin hai

lekin wo hamein likhta rahe KHat use kahna

kahna ki use aaj bhi hum yaad kare hain

hai ab bhi hamein us se mohabbat use kahna

bas pyar se ek bar mera nam pukare

jab bhi ho use meri zarurat use kahna

le jaega hamrah mein aa'mal wo apne

rah jaegi duniya mein hi daulat use kahna