mila hua kabhi sine se un ke sina tha

milā huā kabhī siine se un ke siina thā

ajab vo roz the yā-rab ajab mahīna thā

adam meñ jā ke kaheñge har ek se ham bhī

abas fuzūl jahāñ meñ hamārā jiinā thā

daġhā raqīb ne kī aap se to kyā shikva

zamāna us ko kahegā ki vo kamīna thā

ye kyā ki yūñhī chale mai-kade se hazrat-e-shaiḳh

tumheñ ḳhudā kī qasam koī ghūñT piinā thā

jo tum ne siina mirā chāk-chāk kar Daalā

har ek zaḳhm ko tār-e-nigah se siinā thā

mahak rahā thā mirā ghar tamām vasl kī shab

vo itr-bez kisī kā bhī kyā pasīnā thā

nahīñ hai dil jo hamārā to shab ko mahfil meñ

zarā ḳhayāl karo ḳhud hī kis ne chhīnā thā

jo tum ne lete hī jaldī se us ko toḌ diyā

hamārā dil thā koī yā ye ābgīna thā

vo rind huuñ ki zabāñ par bhī vaqt-e-marg mirī

surāhī-o-ḳhum-o-jām-o-ayāġh-o-mīnā thā

yahāñ rahī ki vahāñ pahūñchī 'ranj' kī mayyat

zabāñ pe us kī magar rāt-din madīna thā

mila hua kabhi sine se un ke sina tha

ajab wo roz the ya-rab ajab mahina tha

adam mein ja ke kahenge har ek se hum bhi

abas fuzul jahan mein hamara jina tha

dagha raqib ne ki aap se to kya shikwa

zamana us ko kahega ki wo kamina tha

ye kya ki yunhi chale mai-kade se hazrat-e-shaiKH

tumhein KHuda ki qasam koi ghunT pina tha

jo tum ne sina mera chaak-chaak kar Dala

har ek zaKHm ko tar-e-nigah se sina tha

mahak raha tha mera ghar tamam wasl ki shab

wo itr-bez kisi ka bhi kya pasina tha

nahin hai dil jo hamara to shab ko mahfil mein

zara KHayal karo KHud hi kis ne chhina tha

jo tum ne lete hi jaldi se us ko toD diya

hamara dil tha koi ya ye aabgina tha

wo rind hun ki zaban par bhi waqt-e-marg meri

surahi-o-KHum-o-jam-o-ayagh-o-mina tha

yahan rahi ki wahan pahunchi 'ranj' ki mayyat

zaban pe us ki magar raat-din madina tha