mila ke honTon ke zahrab aabginon mein

milā ke hoñToñ ke zahrāb ābgīnoñ meñ

ye kis ne aag sī bhar dī hamāre sīnoñ meñ

ab is ke baa'd koī chehra dekhnā hī nahīñ

ham apnī āñkheñ bhī chhoḌ aa.e mah-jabīnoñ meñ

kisī kī āñkhoñ meñ jhāñkūñ to apnā aks mile

ab aise log kahāñ haiñ tamāsh-bīnoñ meñ

unhīñ ke talvoñ se kāñTe lahū nasīb hue

jo chāñd bote rahe umr bhar zamīnoñ meñ

halāl rizq kabhī rā.egāñ nahīñ jaatā

ki chyūñTiyāñ kabhī lagtīñ nahīñ pasīnoñ meñ

tabassumoñ se hī kaam us kā chal gayā varna

chhupā ke laayā thā ḳhanjar bhī āstīnoñ meñ

na jaane kaun sī kashtī meñ jā ke baiTh gayā

duā-e-māñ mutalāshī rahī safīnoñ meñ

in ūñche logoñ meñ 'anvar' kabhī nahīñ miltā

jo ilm-o-fan hai chhupā boriyā-nashīnoñ meñ

mila ke honTon ke zahrab aabginon mein

ye kis ne aag si bhar di hamare sinon mein

ab is ke ba'd koi chehra dekhna hi nahin

hum apni aankhen bhi chhoD aae mah-jabinon mein

kisi ki aankhon mein jhankun to apna aks mile

ab aise log kahan hain tamash-binon mein

unhin ke talwon se kanTe lahu nasib hue

jo chand bote rahe umr bhar zaminon mein

halal rizq kabhi raegan nahin jata

ki chyunTiyan kabhi lagtin nahin pasinon mein

tabassumon se hi kaam us ka chal gaya warna

chhupa ke laya tha KHanjar bhi aastinon mein

na jaane kaun si kashti mein ja ke baiTh gaya

dua-e-man mutalashi rahi safinon mein

in unche logon mein 'anwar' kabhi nahin milta

jo ilm-o-fan hai chhupa boriya-nashinon mein