mila mila ke nazar muskurae jate hain

milā milā ke nazar muskurā.e jaate haiñ

vo chashm-e-mast kā jaadū jagā.e jaate haiñ

ham apnī mashq-e-tasavvur kī dast-gīrī se

naqāb ruḳh se kisī ke uThā.e jaate haiñ

raqīb kyā sitam-e-nā-ravā ki sah na sake

kisī kī bazm meñ ham kyoñ bulā.e jaate haiñ

kisī ke naaz kī tasvīr khiñchtī jaatī hai

sar-e-niyāz ham apnā jhukā.e jaate haiñ

vo bhūle jaate haiñ tarz-e-jafā-e-be-jā ko

ham apnā zor-e-vafā āzmā.e jaate haiñ

hamārā qissa hamārā samajh ke kab sunte

badal ke naam ham un ko sunā.e jaate haiñ

vo apne tazkira-e-husn se haiñ ḳhush 'bedil'

unheñ ġhazal pe ġhazal ham sunā.e jaate haiñ

mila mila ke nazar muskurae jate hain

wo chashm-e-mast ka jadu jagae jate hain

hum apni mashq-e-tasawwur ki dast-giri se

naqab ruKH se kisi ke uThae jate hain

raqib kya sitam-e-na-rawa ki sah na sake

kisi ki bazm mein hum kyon bulae jate hain

kisi ke naz ki taswir khinchti jati hai

sar-e-niyaz hum apna jhukae jate hain

wo bhule jate hain tarz-e-jafa-e-be-ja ko

hum apna zor-e-wafa aazmae jate hain

hamara qissa hamara samajh ke kab sunte

badal ke nam hum un ko sunae jate hain

wo apne tazkira-e-husn se hain KHush 'bedil'

unhen ghazal pe ghazal hum sunae jate hain