mila na kaun-o-makan mein to la-makan dekha

milā na kaun-o-makāñ meñ to lā-makāñ dekhā

par us ko dekhā na us kā koī nishāñ dekhā

jo us meñ dekhā pareshān-o-ḳhasta-jāñ dekhā

zamīn-e-kūcha-e-qātil ko āsmāñ dekhā

jab apne dil meñ tirā jalva zau-fishāñ dekhā

na us meñ phir ġham-e-duniyā ko mehmāñ dekhā

har ashk-e-chashm ko to dil kā tarjumāñ dekhā

dam-e-ġharīb ko hī dil kā rāz-dāñ dekhā

uruuj husn ko hāsil hai ishq ke dam se

jahāñ meñ ishq kā phir bhī na qadr-dāñ dekhā

dil-āzmā hai zi-bas ishq kā zamāna bhī

qadam qadam pe mohabbat meñ imtihāñ dekhā

shagufta haiñ gul-e-zaḳhm-e-jigar ḳhizāñ meñ bhī

sadā-bahār khilā dil kā bostāñ dekhā

vo tinke nazr hue barq-o-bād-e-sarsar ke

asiir jab se hue phir na āshiyāñ dekhā

hai dafn jo tirī tasvīr-e-be-kasī 'jauhar'

tire mazār pe hasrat ko nauha-ḳhvāñ dekhā

mila na kaun-o-makan mein to la-makan dekha

par us ko dekha na us ka koi nishan dekha

jo us mein dekha pareshan-o-KHasta-jaan dekha

zamin-e-kucha-e-qatil ko aasman dekha

jab apne dil mein tera jalwa zau-fishan dekha

na us mein phir gham-e-duniya ko mehman dekha

har ashk-e-chashm ko to dil ka tarjuman dekha

dam-e-gharib ko hi dil ka raaz-dan dekha

uruj husn ko hasil hai ishq ke dam se

jahan mein ishq ka phir bhi na qadr-dan dekha

dil-azma hai zi-bas ishq ka zamana bhi

qadam qadam pe mohabbat mein imtihan dekha

shagufta hain gul-e-zaKHm-e-jigar KHizan mein bhi

sada-bahaar khila dil ka bostan dekha

wo tinke nazr hue barq-o-baad-e-sarsar ke

asir jab se hue phir na aashiyan dekha

hai dafn jo teri taswir-e-be-kasi 'jauhar'

tere mazar pe hasrat ko nauha-KHwan dekha