milan na raegan jae samay se par milen

milan na rā.egāñ jaa.e samay se paar mileñ

ki ek dūsre kā ban ke ham qarār mileñ

ajiib apnā muqaddar ajiib mahrūmī

ki tere hote hue tere intizār mileñ

maiñ naqd-e-jān ko bhī shauq se rakhūñ girvī

tumhāre qurb ke lamhe agar udhār mileñ

bahār phuul dhanak chāñdnī ghaTā mausam

tumhārī ek hañsī par sabhī nisār mileñ

jo khol khol ke dekhūñ ye zaḳhm-hā-e-jigar

ajab nahīñ ki hameñ dostoñ ke vaar mileñ

ḳhushā nasīb ki manzil qarīb-tar hogī

dhamāl Daalo jo raste meñ tum ko ḳhaar mileñ

hadoñ ne chhīn liyā hai hamārā qurb sanam

so apne apne badan ko zarā utaar mileñ

ye imtiyāz-e-man-o-tū miTegā kab āḳhir

myān-e-tālib-o-mtlūb bhī hisār mileñ

samajh gayā thā tujhe dekhte hī jān-e-'shajar'

hazār baar luTeñge jo ek baar mileñ

milan na raegan jae samay se par milen

ki ek dusre ka ban ke hum qarar milen

ajib apna muqaddar ajib mahrumi

ki tere hote hue tere intizar milen

main naqd-e-jaan ko bhi shauq se rakhun girwi

tumhaare qurb ke lamhe agar udhaar milen

bahaar phul dhanak chandni ghaTa mausam

tumhaari ek hansi par sabhi nisar milen

jo khol khol ke dekhun ye zaKHm-ha-e-jigar

ajab nahin ki hamein doston ke war milen

KHusha nasib ki manzil qarib-tar hogi

dhamal Dalo jo raste mein tum ko KHar milen

hadon ne chhin liya hai hamara qurb sanam

so apne apne badan ko zara utar milen

ye imtiyaz-e-man-o-tu miTega kab aaKHir

myan-e-talib-o-mtlub bhi hisar milen

samajh gaya tha tujhe dekhte hi jaan-e-'shajar'

hazar bar luTenge jo ek bar milen