mile bina hi bichhaDne ke Dar se lauT aae

mile binā hī bichhaḌne ke Dar se lauT aa.e

'ajīb ḳhauf meñ ham us ke dar se lauT aa.e

na aise roiye nākāmī-e-mohabbat par

ḳhushī manā.iye zinda bhañvar se lauT aa.e

ye sochte hue baiThe haiñ raah meñ ruk kar

udhar ga.e hī nahīñ the jidhar se lauT aa.e

lab us ke sāmne the aur ham ne chūmā nahīñ

samajh lo paañv uThe aur dar se lauT aa.e

abhī to vaqt hai sūraj ke Dūbne meñ to phir

ye kyā huā ki parinde safar se lauT aa.e

kisī bhī tarah ye duniyā na chhoḌ paa.e ham

ki jab bhī nikle tirī rahguzar se lauT aa.e

phir us ne dekhā koī taarā TūTte ik raat

phir ek roz musāfir safar se lauT aa.e

lageñgī aur bhī tarkīb us ko laane meñ

koī zarūrī hai samjhāne bhar se lauT aa.e

ye kis kī dhun thī jo dīvār-o-dar na pahchānā

ye kis ḳhayāl meñ apne hī ghar se lauT aa.e

mire guzarne kī afvāh hī uḌā de koī

kise ḳhabar ki vo jhūTī ḳhabar se lauT aa.e

mile bina hi bichhaDne ke Dar se lauT aae

'ajib KHauf mein hum us ke dar se lauT aae

na aise roiye nakaami-e-mohabbat par

KHushi manaiye zinda bhanwar se lauT aae

ye sochte hue baiThe hain rah mein ruk kar

udhar gae hi nahin the jidhar se lauT aae

lab us ke samne the aur hum ne chuma nahin

samajh lo panw uThe aur dar se lauT aae

abhi to waqt hai suraj ke Dubne mein to phir

ye kya hua ki parinde safar se lauT aae

kisi bhi tarah ye duniya na chhoD pae hum

ki jab bhi nikle teri rahguzar se lauT aae

phir us ne dekha koi tara TuTte ek raat

phir ek roz musafir safar se lauT aae

lagengi aur bhi tarkib us ko lane mein

koi zaruri hai samjhane bhar se lauT aae

ye kis ki dhun thi jo diwar-o-dar na pahchana

ye kis KHayal mein apne hi ghar se lauT aae

mere guzarne ki afwah hi uDa de koi

kise KHabar ki wo jhuTi KHabar se lauT aae