mile hain dard hi mujhko mohabbaton ke ewaz

mile haiñ dard hī mujh ko mohabbatoñ ke evaz

sile meñ haath kaTe haiñ mashaqqatoñ ke evaz

ḳhamosh rah ke bhī maiñ guftugū karūñ un se

nigāh vo mirī paḌh leñ samā.atoñ ke evaz

gharoñ meñ sham.a kī sūrat vo raushnī kar ke

pighal rahā hai har ik pal tamāzatoñ ke evaz

na pūchho baap se apne kabhī shab-e-hijrat

milegā kyā tumheñ un kī vasiyyatoñ ke evaz

palaT ke ham ne bhī ik baar phir nahīñ dekhā

falak jo bech diye ham ne kal chhatoñ ke evaz

maiñ jī bhī jā.ūñ to tanhā.ī mujh ko Das legī

chahār samt muqātil haiñ qurbatoñ ke evaz

ai kaash merā bhī hamdard ho koī 'shārib'

mujhe rihā.ī dilā.e zamānatoñ ke evaz

mile hain dard hi mujh ko mohabbaton ke ewaz

sile mein hath kaTe hain mashaqqaton ke ewaz

KHamosh rah ke bhi main guftugu karun un se

nigah wo meri paDh len samaaton ke ewaz

gharon mein shama ki surat wo raushni kar ke

pighal raha hai har ek pal tamazaton ke ewaz

na puchho bap se apne kabhi shab-e-hijrat

milega kya tumhein un ki wasiyyaton ke ewaz

palaT ke hum ne bhi ek bar phir nahin dekha

falak jo bech diye hum ne kal chhaton ke ewaz

main ji bhi jaun to tanhai mujh ko Das legi

chahaar samt muqatil hain qurbaton ke ewaz

ai kash mera bhi hamdard ho koi 'shaarib'

mujhe rihai dilae zamanaton ke ewaz