ملے جو غم بھی تو اس کو برت خوشی کی طرح

ملے جو غم بھی تو اس کو برت خوشی کی طرح

گزار زندگی نادان زندگی کی طرح

جہاں پہ حق ہو وہاں حق کی بات کہہ دیجے

خموش رہنا بھی ہے جرم خودکشی کی طرح

جہان حرص و ہوس کا تو ہے گلہ تاہم

ملے ہیں مجھ کو فرشتے بھی آدمی کی طرح

جو بات شیریں بیانی کا عکس رکھتی ہے

وہ بات دل میں اترتی ہے روشنی کی طرح

وگرنہ رسم جہاں داریٔ حیات نبھا

کسی کو چاہ تو پھر چاہ بندگی کی طرح

وفا کی حرمت بے حد کا پاس تھا مجھ کو

تمہارے شہر سے گزرا ہوں اجنبی کی طرح

میں اپنا آپ مکمل وجود ہوں شارقؔ

مجھے غرض ہی نہیں ہے بنوں کسی کی طرح