mile jo naqa-e-wahshat ko sarban koi

mile jo nāqa-e-vahshat ko sārbāñ koī

dikhā.ūñ qāfila-e-ḳhvāb kā nishāñ koī

ḳhamoshiyoñ hī se mashrūt hai janam merā

so merī raakh se uThtā nahīñ dhuāñ koī

ḳhasāra aur hī hotā thā be-gharī kā magar

mujhe makān meñ rakhtā hai be-makāñ koī

kisī se hone na hone ke darmiyāñ ho jo rabt

vahīñ to rabt meñ aatā hai darmiyāñ koī

surāġh de ke mujhe merī be-zabānī kā

mujhī meñ aan basā mujh sā be-zabāñ koī

tū mere aks ko mīzān-e-ā.ina meñ na tol

uThā rahā hai abhī merī kirchiyāñ koī

tire ḳhayāl kī ābādiyāñ chhupātī huuñ

ki mujh se chhīn na le merī bastiyāñ koī

mile jo naqa-e-wahshat ko sarban koi

dikhaun qafila-e-KHwab ka nishan koi

KHamoshiyon hi se mashrut hai janam mera

so meri rakh se uThta nahin dhuan koi

KHasara aur hi hota tha be-ghari ka magar

mujhe makan mein rakhta hai be-makan koi

kisi se hone na hone ke darmiyan ho jo rabt

wahin to rabt mein aata hai darmiyan koi

suragh de ke mujhe meri be-zabani ka

mujhi mein aan basa mujh sa be-zaban koi

tu mere aks ko mizan-e-aina mein na tol

uTha raha hai abhi meri kirchiyan koi

tere KHayal ki aabaadiyan chhupati hun

ki mujh se chhin na le meri bastiyan koi