mili hai kaise gunahon ki ye saza mujhko

milī hai kaise gunāhoñ kī ye sazā mujh ko

Darātā rahtā hai apnā hī ā.īna mujh ko

maiñ kis fasāne kā hissa huuñ kah nahīñ saktā

vajūd apnā bhī lagtā hai vāqi.a mujh ko

ab āsmāñ kī chalo had talāsh kī jaa.e

bulā rahā hai sitāroñ kā qāfila mujh ko

maiñ kā.enāt pe apnī nigāh Dāltā huuñ

tire ḳhayāl kī miltī hai jab ziyā mujh ko

salām kartā huuñ ra.anā.ī-e-hayāt tujhe

ab aur koī tamāshā nahīñ dikhā mujh ko

tirī ḳhamoshī meñ muzmar hai merā rāz-e-suḳhan

ki be-zabān na kar de tirī sadā mujh ko

vahī aziim hai jo bāñTtā ho dard-e-vajūd

usī ke vasl kā 'rāshid' hai aasrā mujh ko

mili hai kaise gunahon ki ye saza mujh ko

Daraata rahta hai apna hi aaina mujh ko

main kis fasane ka hissa hun kah nahin sakta

wajud apna bhi lagta hai waqia mujh ko

ab aasman ki chalo had talash ki jae

bula raha hai sitaron ka qafila mujh ko

main kaenat pe apni nigah Dalta hun

tere KHayal ki milti hai jab ziya mujh ko

salam karta hun ranai-e-hayat tujhe

ab aur koi tamasha nahin dikha mujh ko

teri KHamoshi mein muzmar hai mera raaz-e-suKHan

ki be-zaban na kar de teri sada mujh ko

wahi azim hai jo banTta ho dard-e-wajud

usi ke wasl ka 'rashid' hai aasra mujh ko