mili jo fursat-e-yak-lamha zindagi ke liye

milī jo fursat-e-yak-lamha zindagī ke liye

hazār kaam nikal aa.e aadmī ke liye

vo zinda log haiñ Thukrā ke jo havādis ko

nikālte haiñ na.ī raah aadmī ke liye

jo ahl-e-dil haiñ tire ġham kī qadr karte haiñ

ye ik charāġh hī kaafī hai raushnī ke liye

koī taḌap koī halchal na koī hangāma

sukūñ bhī ek qayāmat hai aadmī ke liye

itāb-e-dost kahāñ sab ko raas aatā hai

ye zahr qand hai lekin kisī kisī ke liye

hamārā haal kuchh aisā tire dayār meñ hai

ki jaise shahr ke raste ik ajnabī ke liye

fasurdagī hī ma.āl-e-shaguftagī hai 'majīd'

kise ḳhabar ki hañsī maut hai kalī ke liye

mili jo fursat-e-yak-lamha zindagi ke liye

hazar kaam nikal aae aadmi ke liye

wo zinda log hain Thukra ke jo hawadis ko

nikalte hain nai rah aadmi ke liye

jo ahl-e-dil hain tere gham ki qadr karte hain

ye ek charagh hi kafi hai raushni ke liye

koi taDap koi halchal na koi hangama

sukun bhi ek qayamat hai aadmi ke liye

itab-e-dost kahan sab ko ras aata hai

ye zahr qand hai lekin kisi kisi ke liye

hamara haal kuchh aisa tere dayar mein hai

ki jaise shahr ke raste ek ajnabi ke liye

fasurdagi hi maal-e-shaguftagi hai 'majid'

kise KHabar ki hansi maut hai kali ke liye