mili nigahen uTha talatum ajib dil par asar hua hai

milī nigāheñ uThā talātum ajiib dil par asar huā hai

jo haal merā idhar huā hai vo haal un kā udhar huā hai

mirī alālat pe dauḌe aa.e milī nigāheñ to jal ke bole

Darā diyā thā qasam ḳhudā kī sunā thā dard-e-jigar huā hai

chaman meñ barpā hai shor-e-mātam guloñ ke chehre utar ga.e haiñ

ye bāġhbānoñ ke hī karam se nizām zer-o-zabar huā hai

hasad kī ātish bhaḌak rahī hai huā hai bhaa.ī kā bhaa.ī dushman

makānoñ se uTh rahe haiñ sho.ale ki nazr-e-ātish nagar huā hai

jo mujh se nafrat hai un ko itnī uThā leñ ḳhanjar na uf karūñgā

unhoñ ne hī dil kiyā hai ghāyal unhīñ se zaḳhmī jigar huā hai

maiñ tishnagī kā karūñ jo shikva tarāsh merī zabān saaqī

magar batā de ḳhatā hai kis kī jo mai-kada muntashar huā hai

chalo musammam ye ahd kar leñ miTā deñ ham dushmanī jahāñ se

sikhā.eñ bātil ko ham sa.ādat jo haq se bhī be-ḳhabar huā hai

yahī to me.arāj-e-āshiqī hai yahī to vaj.h-e-sukūn hogā

bas ek dafa vo kah de 'monis' tirī vafā kā asar huā hai

mili nigahen uTha talatum ajib dil par asar hua hai

jo haal mera idhar hua hai wo haal un ka udhar hua hai

meri alalat pe dauDe aae mili nigahen to jal ke bole

Dara diya tha qasam KHuda ki suna tha dard-e-jigar hua hai

chaman mein barpa hai shor-e-matam gulon ke chehre utar gae hain

ye baghbanon ke hi karam se nizam zer-o-zabar hua hai

hasad ki aatish bhaDak rahi hai hua hai bhai ka bhai dushman

makanon se uTh rahe hain shoale ki nazr-e-atish nagar hua hai

jo mujh se nafrat hai un ko itni uTha len KHanjar na uf karunga

unhon ne hi dil kiya hai ghayal unhin se zaKHmi jigar hua hai

main tishnagi ka karun jo shikwa tarash meri zaban saqi

magar bata de KHata hai kis ki jo mai-kada muntashar hua hai

chalo musammam ye ahd kar len miTa den hum dushmani jahan se

sikhaen baatil ko hum saadat jo haq se bhi be-KHabar hua hai

yahi to mearaj-e-ashiqi hai yahi to wajh-e-sukun hoga

bas ek dafa wo kah de 'monis' teri wafa ka asar hua hai