millaten jab jada-e-haq se gurezan ho gain

millateñ jab jāda-e-haq se gurezāñ ho ga.iiñ

jaane kitnī bastiyāñ shahr-e-ḳhamoshāñ ho ga.ī

pastiyāñ panjoñ ke bal uchhlī to qīmat baḌh ga.iiñ

azmateñ bāzār meñ pahuñchīñ to arzāñ ho ga.iiñ

zabt-e-ġham kā ye tamāsha bhī kisī din dekhnā

āñdhiyāñ tinkoñ se Takrā kar pashemāñ ho ga.iiñ

izzat-o-nāmūs ke da.ave fasāna ban ga.iiñ

ismateñ jab ḳhud bharī mahfil meñ uryāñ ho ga.iiñ

be-hisī ḳhud-ġharziyāñ ayyāriyāñ makr-o-fareb

āj-kal ye ḳhūbiyāñ izzat kā sāmāñ ho ga.iiñ

aap to ḳhāmosh rah kar bhī bahut kuchh kah ga.e

ranjisheñ jo dil pe thiiñ ruḳh par numāyāñ ho ga.iiñ

vo bhī kyā din the ki jab āzād the zehn-o-zamīr

ab to in bātoñ ke guzre jaise sadiyāñ ho ga.iiñ

millaten jab jada-e-haq se gurezan ho gain

jaane kitni bastiyan shahr-e-KHamoshan ho gai

pastiyan panjon ke bal uchhli to qimat baDh gain

azmaten bazar mein pahunchin to arzan ho gain

zabt-e-gham ka ye tamasha bhi kisi din dekhna

aandhiyan tinkon se Takra kar pasheman ho gain

izzat-o-namus ke dawe fasana ban gain

ismaten jab KHud bhari mahfil mein uryan ho gain

be-hisi KHud-gharziyan ayyariyan makr-o-fareb

aaj-kal ye KHubiyan izzat ka saman ho gain

aap to KHamosh rah kar bhi bahut kuchh kah gae

ranjishen jo dil pe thin ruKH par numayan ho gain

wo bhi kya din the ki jab aazad the zehn-o-zamir

ab to in baaton ke guzre jaise sadiyan ho gain