milne ka un se ab koi imkan bhi nahin

milne kā un se ab koī imkān bhī nahīñ

lekin na jaane kyoñ maiñ pareshān bhī nahīñ

har dam usī kī yaad hai zahrāb-e-jāñ mujhe

maiñ us ko bhuul jā.ūñ ye āsān bhī nahīñ

maanā ki us se rabt-o-ta.alluq nahīñ koī

kyā us kā ishq ab mirī pahchān bhī nahīñ

ab us se kyā umīd-e-vafā ham bhalā kareñ

apnī ḳhatāoñ par jo pashemān bhī nahīñ

mar-mar ke maiñ ne ḳhud hī guzārī hai zindagī

is zindagī kā mujh pe kuchh ehsān bhī nahīñ

'vāsil' ajiib shaḳhs hai jis ko ki aaj tak

dushman kī aur dost kī pahchān bhī nahīñ

milne ka un se ab koi imkan bhi nahin

lekin na jaane kyon main pareshan bhi nahin

har dam usi ki yaad hai zahrab-e-jaan mujhe

main us ko bhul jaun ye aasan bhi nahin

mana ki us se rabt-o-talluq nahin koi

kya us ka ishq ab meri pahchan bhi nahin

ab us se kya umid-e-wafa hum bhala karen

apni KHataon par jo pasheman bhi nahin

mar-mar ke main ne KHud hi guzari hai zindagi

is zindagi ka mujh pe kuchh ehsan bhi nahin

'wasil' ajib shaKHs hai jis ko ki aaj tak

dushman ki aur dost ki pahchan bhi nahin