milne ki mujhe yar se fursat nahin milti

milne kī mujhe yaar se fursat nahīñ miltī

ai marg Thahar jā abhī ruḳhsat nahīñ miltī

kuchh pairahan-e-yār kī nik.hat nahīñ miltī

yūsuf kī hameñ apne bashārat nahīñ miltī

zardār se duniyā kī bizā.at nahīñ miltī

ganjīna-e-ḳhurshīd se daulat nahīñ miltī

hai har-nafas ik durr-e-nafīs ai dil-e-nādāñ

ye jins-e-girāñ hai ki ba-qīmat nahīñ miltī

yā ham se the har pal tirī chitvan ke ishāre

yā aañkh bhī ab mahv-e-sharārat nahīñ miltī

ham dil pe liye dāġh-e-junūñ jaate haiñ āḳhir

kuchh aur nishānī dam-e-ruḳhsat nahīñ miltī

zanjīr tire haath se pahnūñgā gale meñ

gar silsila-e-zulf meñ bai'at nahīñ miltī

mat jaan de us but pe dilā bahr-e-ḳhudā tū

kyā tujh ko koī dūsrī sūrat nahīñ miltī

ab aañkh milāne kā nahīñ yaar se yaarā

dil us se milā jis se tabī.at nahīñ miltī

un se jo kisī ne kahā kushte ko tumhāre

us kūche meñ bhī jā pa.e-turbat nahīñ miltī

ho kar vo ḳhafā kahne lage murde to dar-gor

zindoñ ko yahāñ jā-e-iqāmat nahīñ miltī

us ġhairat-e-īsā ke jo ġham meñ huuñ giraftār

'daula' mujhe marne kī bhī fursat nahīñ miltī

milne ki mujhe yar se fursat nahin milti

ai marg Thahar ja abhi ruKHsat nahin milti

kuchh pairahan-e-yar ki nikhat nahin milti

yusuf ki hamein apne bashaarat nahin milti

zardar se duniya ki bizaat nahin milti

ganjina-e-KHurshid se daulat nahin milti

hai har-nafas ek durr-e-nafis ai dil-e-nadan

ye jins-e-giran hai ki ba-qimat nahin milti

ya hum se the har pal teri chitwan ke ishaare

ya aankh bhi ab mahw-e-shararat nahin milti

hum dil pe liye dagh-e-junun jate hain aaKHir

kuchh aur nishani dam-e-ruKHsat nahin milti

zanjir tere hath se pahnunga gale mein

gar silsila-e-zulf mein bai'at nahin milti

mat jaan de us but pe dila bahr-e-KHuda tu

kya tujh ko koi dusri surat nahin milti

ab aankh milane ka nahin yar se yara

dil us se mila jis se tabiat nahin milti

un se jo kisi ne kaha kushte ko tumhaare

us kuche mein bhi ja pae-turbat nahin milti

ho kar wo KHafa kahne lage murde to dar-gor

zindon ko yahan ja-e-iqamat nahin milti

us ghairat-e-isa ke jo gham mein hun giraftar

'daula' mujhe marne ki bhi fursat nahin milti