milne mein mujhko aap se kya ijtinab tha

milne meñ mujh ko aap se kyā ijtināb thā

par kyā kareñ ki shahr kā mausam ḳharāb thā

jab jā chuke tamām hī rishtoñ ke qāfile

maiñ thā tumhārī yaad kā taaza gulāb thā

sab log aa ke apnī kahānī sunā ga.e

maiñ kuchh na kah sakā mujhe kitnā hijāb thā

duniyā ke saare raaz se vāqif to thā magar

vo paḌh sakā na mujh ko maiñ aisī kitāb thā

muTThī meñ us kī band thiiñ merī zarūrateñ

maiñ thā mahaz savāl vo merā javāb thā

maiñ ne kahīñ 'nasīm' ko dekhā thā raah meñ

chehra thā us kā zard to huliya ḳharāb thā

milne mein mujh ko aap se kya ijtinab tha

par kya karen ki shahr ka mausam KHarab tha

jab ja chuke tamam hi rishton ke qafile

main tha tumhaari yaad ka taza gulab tha

sab log aa ke apni kahani suna gae

main kuchh na kah saka mujhe kitna hijab tha

duniya ke sare raaz se waqif to tha magar

wo paDh saka na mujh ko main aisi kitab tha

muTThi mein us ki band thin meri zaruraten

main tha mahaz sawal wo mera jawab tha

main ne kahin 'nasim' ko dekha tha rah mein

chehra tha us ka zard to huliya KHarab tha