jaana ki shaghl rakhte ho tir-o-kaman se tum

jaanā ki shaġhl rakhte ho tīr-o-kamāñ se tum

par mil chalā karo bhī kaso ḳhasta-jāñ se tum

ham apnī chaak jeb ko sī rahte yā nahīñ

phāTe meñ paañv dene ko aa.e kahāñ se tum

ab dekhte haiñ ḳhuub to vo baat hī nahīñ

kyā kyā vagarna kahte the apnī zabāñ se tum

tinke bhī tum Thaharte kahīñ dekhe haiñ tanik

chashm-e-vafā rakho na ḳhasān-e-jahāñ se tum

jaao na dil se manzar-e-tan meñ hai jā yahī

pachhtāoge uThoge agar is makāñ se tum

qissa mirā sunoge to jaatī rahegī niiñd

ārām chashm mat rakho is dāstāñ se tum

khul jā.eñgī phir āñkheñ jo mar jā.egā koī

aate nahīñ ho baaz mire imtihāñ se tum

jitne the kal tum aaj nahīñ paate itnā ham

har-dam chale hī jaate ho āb-e-ravāñ se tum

rahte nahīñ ho ban ga.e 'mīr' us galī meñ raat

kuchh raah bhī nikālo sag-o-pāsbāñ se tum

jaana ki shaghl rakhte ho tir-o-kaman se tum

par mil chala karo bhi kaso KHasta-jaan se tum

hum apni chaak jeb ko si rahte ya nahin

phaTe mein panw dene ko aae kahan se tum

ab dekhte hain KHub to wo baat hi nahin

kya kya wagarna kahte the apni zaban se tum

tinke bhi tum Thaharte kahin dekhe hain tanik

chashm-e-wafa rakho na KHasan-e-jahan se tum

jao na dil se manzar-e-tan mein hai ja yahi

pachhtaoge uThoge agar is makan se tum

qissa mera sunoge to jati rahegi nind

aaram chashm mat rakho is dastan se tum

khul jaengi phir aankhen jo mar jaega koi

aate nahin ho baz mere imtihan se tum

jitne the kal tum aaj nahin pate itna hum

har-dam chale hi jate ho aab-e-rawan se tum

rahte nahin ho ban gae 'mir' us gali mein raat

kuchh rah bhi nikalo sag-o-pasban se tum