gai chhanw us tegh ki sar se jab ki

ga.ī chhāñv us teġh kī sar se jab kī

jale dhuup meñ yaañ talak ham ki tab kī

paḌī ḳhirman-e-gul pe bijlī sī āḳhir

mire ḳhush-nigah kī nigāh ik ġhazab kī

koī baat nikle hai dushvār muñh se

Tak ik to bhī to sun kisī jāñ-ba-lab kī

tū shamla jo rakhtā hai ḳhar hai vagarna

zarūrat hai kyā shaiḳh dam ik vajab kī

yakāyak bhī aa sar pe vāmāñdgāñ ke

bahut dekhte haiñ tirī raah kab kī

dimāġh-o-jigar dil muḳhālif hue haiñ

huī muttafiq ab idhar raa.e sab kī

tujhe kyūñke DhūñDūñ ki sote hī guzrī

tirī raah meñ apne piye talab kī

dil arsh se guzre hai zo.af meñ bhī

ye zor-āvarī dekho zārī-e-shab kī

ajab kuchh hai gar 'mīr' aave mayassar

gulābī sharāb aur ġhazal apne Dhab kī

gai chhanw us tegh ki sar se jab ki

jale dhup mein yan talak hum ki tab ki

paDi KHirman-e-gul pe bijli si aaKHir

mere KHush-nigah ki nigah ek ghazab ki

koi baat nikle hai dushwar munh se

Tak ek to bhi to sun kisi jaan-ba-lab ki

tu shamla jo rakhta hai KHar hai wagarna

zarurat hai kya shaiKH dam ek wajab ki

yakayak bhi aa sar pe wamandgan ke

bahut dekhte hain teri rah kab ki

dimagh-o-jigar dil muKHalif hue hain

hui muttafiq ab idhar rae sab ki

tujhe kyunke DhunDun ki sote hi guzri

teri rah mein apne piye talab ki

dil arsh se guzre hai zoaf mein bhi

ye zor-awari dekho zari-e-shab ki

ajab kuchh hai gar 'mir' aawe mayassar

gulabi sharab aur ghazal apne Dhab ki