guzra bana-e-charKH se nala pagah ka

guzrā banā-e-charḳh se naala pagāh kā

ḳhāna-ḳharāb ho jiyo is dil kī chaah kā

āñkhoñ meñ jī mirā hai udhar dekhtā nahīñ

martā huuñ meñ to haa.e re sarfa nigāh kā

sad ḳhānumāñ-ḳharāb haiñ har har qadam pe dafan

kushta huuñ yaar maiñ to tire ghar kī raah kā

yak qatra ḳhuun ho ke palak se Tapak paḌā

qissa ye kuchh huā dil-e-ġhufrāñ-panāh kā

talvār mārnā to tumheñ khel hai vale

jaatā rahe na jaan kisū be-gunāh kā

bad-nām-o-ḳhvar-o-zār-o-nazār-o-shikasta-hāl

ahvāl kuchh na pūchhiye us rū-siyāh kā

zālim zamīñ se lauTtā dāman uThā ke chal

hogā kamīñ meñ haath kisū dād-ḳhvāh kā

ai tāj-e-shah na sar ko farv lā.ūñ tere paas

hai mo'taqid faqīr namad kī kulāh kā

har laḳht-e-dil meñ said ke paikān bhī ga.e

dekhā maiñ shoḳh ThāTh tirī said-e-gāh kā

bīmār tū na hove jiye jab talak ki 'mīr'

sone na degā shor tirī aah aah kā

guzra bana-e-charKH se nala pagah ka

KHana-KHarab ho jiyo is dil ki chah ka

aankhon mein ji mera hai udhar dekhta nahin

marta hun mein to hae re sarfa nigah ka

sad KHanuman-KHarab hain har har qadam pe dafan

kushta hun yar main to tere ghar ki rah ka

yak qatra KHun ho ke palak se Tapak paDa

qissa ye kuchh hua dil-e-ghufran-panah ka

talwar marna to tumhein khel hai wale

jata rahe na jaan kisu be-gunah ka

bad-nam-o-KHwar-o-zar-o-nazar-o-shikasta-haal

ahwal kuchh na puchhiye us ru-siyah ka

zalim zamin se lauTta daman uTha ke chal

hoga kamin mein hath kisu dad-KHwah ka

ai taj-e-shah na sar ko farw laun tere pas

hai mo'taqid faqir namad ki kulah ka

har laKHt-e-dil mein said ke paikan bhi gae

dekha main shoKH ThaTh teri said-e-gah ka

bimar tu na howe jiye jab talak ki 'mir'

sone na dega shor teri aah aah ka