qayamat hain ye chaspan jame wale

qayāmat haiñ ye chaspāñ jaame vaale

guloñ ne jin kī ḳhātir ḳhirqe Daale

vo kaalā chor hai ḳhāl-e-ruḳh-e-yār

ki sau āñkhoñ meñ dil ho to churā le

nahīñ uThtā dil-e-mahzūñ kā mātam

ḳhudā hī is musībat se nikāle

kahāñ tak duur baiThe baiThe kahiye

kabhū to paas ham ko bhī bulā le

dilā baazī na kar un gesuoñ se

nahīñ āsāñ khilāne saañp kaale

tapish ne dil jigar kī maar Daalā

baġhal meñ dushman apne ham ne paale

na mahke bū-e-gul ai kaash yak-chand

abhī zaḳhm-e-jigar saare haiñ aale

kise qaid-e-qafas meñ yaad gul kī

paḌe haiñ ab to jiine hī ke laale

satāyā 'mīr' ġham-kash ko kinhoñ ne

ki phir ab arsh tak jaate haiñ naale

qayamat hain ye chaspan jame wale

gulon ne jin ki KHatir KHirqe Dale

wo kala chor hai KHal-e-ruKH-e-yar

ki sau aankhon mein dil ho to chura le

nahin uThta dil-e-mahzun ka matam

KHuda hi is musibat se nikale

kahan tak dur baiThe baiThe kahiye

kabhu to pas hum ko bhi bula le

dila bazi na kar un gesuon se

nahin aasan khilane sanp kale

tapish ne dil jigar ki mar Dala

baghal mein dushman apne hum ne pale

na mahke bu-e-gul ai kash yak-chand

abhi zaKHm-e-jigar sare hain aale

kise qaid-e-qafas mein yaad gul ki

paDe hain ab to jine hi ke lale

sataya 'mir' gham-kash ko kinhon ne

ki phir ab arsh tak jate hain nale