yarab koi ho ishq ka bimar na howe

yārab koī ho ishq kā bīmār na hove

mar jaa.e vale us ko ye āzār na hove

zindāñ meñ phañse tauq paḌe qaid meñ mar jaa.e

par dām-e-mohabbat meñ giraftār na hove

us vāste kāñpūñ huuñ ki hai aah nipaT sard

ye baav kaleje ke kahīñ paar na hove

sad nāla-e-jān-kāh haiñ vābasta chaman se

koī baal shikasta pas-e-dīvār na hove

pazhmurda bahut hai gul-e-gulzār hamārā

sharminda-e-yak-gosha-e-dastār na hove

māñge hai duā ḳhalq tujhe dekh ke zālim

yārab kaso ko us se sarokār na hove

kis shakl se ahvāl kahūñ ab maiñ ilāhī

sūrat se mirī jis meñ vo bezār na hove

huuñ dost jo kahtā huuñ sin ai jaan ke dushman

behtar to tujhe tark hai tā-ḳhvār na hove

ḳhūbāñ bure hote haiñ agarche haiñ nakoro

be-jurm kahīñ un kā gunahgār na hove

bāñdhe na phire ḳhuun par apnī to kamar ko

ye jān-e-subuk tan pe tire baar na hove

chaltā hai rah-e-ishq hī us par bhī chale tū

par ek qadam chal kahīñ zinhār na hove

sahrā-e-mohabbat hai qadam dekh ke rakh 'mīr'

ye sair sar-e-kūcha-o-bāzār na hove

yarab koi ho ishq ka bimar na howe

mar jae wale us ko ye aazar na howe

zindan mein phanse tauq paDe qaid mein mar jae

par dam-e-mohabbat mein giraftar na howe

us waste kanpun hun ki hai aah nipaT sard

ye baw kaleje ke kahin par na howe

sad nala-e-jaan-kah hain wabasta chaman se

koi baal shikasta pas-e-diwar na howe

pazhmurda bahut hai gul-e-gulzar hamara

sharminda-e-yak-gosha-e-dastar na howe

mange hai dua KHalq tujhe dekh ke zalim

yarab kaso ko us se sarokar na howe

kis shakl se ahwal kahun ab main ilahi

surat se meri jis mein wo bezar na howe

hun dost jo kahta hun sin ai jaan ke dushman

behtar to tujhe tark hai ta-KHwar na howe

KHuban bure hote hain agarche hain nakoro

be-jurm kahin un ka gunahgar na howe

bandhe na phire KHun par apni to kamar ko

ye jaan-e-subuk tan pe tere bar na howe

chalta hai rah-e-ishq hi us par bhi chale tu

par ek qadam chal kahin zinhaar na howe

sahra-e-mohabbat hai qadam dekh ke rakh 'mir'

ye sair sar-e-kucha-o-bazar na howe