husul kaam ka dil-KHwah yan hua bhi hai

husūl kaam kā dil-ḳhvāh yaañ huā bhī hai

samājat itnī bhī sab se koī ḳhudā bhī hai

muue hī jaate haiñ ham dard-e-ishq se yaaro

kaso ke paas is āzār kī davā bhī hai

udāsiyāñ thiiñ mirī ḳhānqa meñ qābil-e-sair

sanam-kade meñ to Tik aa ke dil lagā bhī hai

ye kahiye kyūñke ki ḳhūbāñ se kuchh nahīñ matlab

lage jo phirte haiñ ham kuchh to mudda.ā bhī hai

tirā hai vahm ki maiñ apne pairahan meñ huuñ

nigāh ġhaur se kar mujh meñ kuchh rahā bhī hai

jo kholūñ sīna-e-majrūh to namak chhiḌke

jarāhat us ko dikhāne kā kuchh maza bhī hai

kahāñ talak shab-o-roz āh-e-dard-e-dil kahiye

har ek baat ko āḳhir kuchh intihā bhī hai

havas to dil meñ hamāre jagah kare lekin

kahīñ hujūm se andoh-e-ġham ke jā bhī hai

ġham-e-firāq hai dumbāla-e-gard aish-e-visāl

faqat maza hī nahīñ ishq meñ balā bhī hai

qubūl kariye tirī rah meñ jī ko kho denā

jo kuchh bhī pā.iye tujh ko to āshnā bhī hai

jigar meñ sozan-e-mizhgāñ ke tiiñ kaDhab na gaḌo

kaso ke zaḳhm ko tū ne kabhū siyā bhī hai

guzār shahr-e-vafā meñ samajh ke kar majnūñ

ki is dayār meñ 'mīr' shikasta-pā bhī hai

husul kaam ka dil-KHwah yan hua bhi hai

samajat itni bhi sab se koi KHuda bhi hai

mue hi jate hain hum dard-e-ishq se yaro

kaso ke pas is aazar ki dawa bhi hai

udasiyan thin meri KHanqa mein qabil-e-sair

sanam-kade mein to Tik aa ke dil laga bhi hai

ye kahiye kyunke ki KHuban se kuchh nahin matlab

lage jo phirte hain hum kuchh to muddaa bhi hai

tera hai wahm ki main apne pairahan mein hun

nigah ghaur se kar mujh mein kuchh raha bhi hai

jo kholun sina-e-majruh to namak chhiDke

jarahat us ko dikhane ka kuchh maza bhi hai

kahan talak shab-o-roz aah-e-dard-e-dil kahiye

har ek baat ko aaKHir kuchh intiha bhi hai

hawas to dil mein hamare jagah kare lekin

kahin hujum se andoh-e-gham ke ja bhi hai

gham-e-firaq hai dumbaala-e-gard aish-e-visal

faqat maza hi nahin ishq mein bala bhi hai

qubul kariye teri rah mein ji ko kho dena

jo kuchh bhi paiye tujh ko to aashna bhi hai

jigar mein sozan-e-mizhgan ke tin kaDhab na gaDo

kaso ke zaKHm ko tu ne kabhu siya bhi hai

guzar shahr-e-wafa mein samajh ke kar majnun

ki is dayar mein 'mir' shikasta-pa bhi hai