jhumke dikha ke tur ko jin ne jala diya

jhumke dikhā ke tuur ko jin ne jalā diyā

aa.ī qayāmat un ne jo parda uThā diyā

us fitne ko jagā ke pashemāñ huī nasīm

kyā kyā 'azīz logoñ ko un ne sulā diyā

ab bhī dimāġh-e-rafta hamārā hai 'arsh par

go āsmāñ ne ḳhaak meñ ham ko milā diyā

jaanī na qadr us guhar shab charāġh kī

dil reza-e-ḳhazaf kī tarah maiñ uThā diyā

taqsīr jaan dene meñ ham ne kabhū na kī

jab teġh vo buland huī sar jhukā diyā

garmī charāġh kī sī nahīñ vo mizāj meñ

ab dil fasurdagī se huuñ jaise bujhā diyā

vo aag ho rahā hai ḳhudā jaane ġhair ne

merī taraf se us ke ta.iiñ kyā lagā diyā

itnā kahā thā farsh tirī rah ke ham hoñ kaash

so tū ne maar maar ke aa kar bichhā diyā

ab ghaTte ghaTte jaan meñ tāqat nahīñ rahī

Tak lag chalī sabā ki diyā sā baḌhā diyā

tangī lagā hai karne dam apnā bhī har ghaḌī

kuḌhne ne dil ke jī ko hamāre khapā diyā

kī chashm tū ne baaz ki kholā dar-e-sitam

kis mudda.ī ḳhalq ne tujh ko jagā diyā

kyā kyā ziyān 'mīr' ne khīñche haiñ 'ishq meñ

dil haath se diyā hai judā sar judā diyā

jhumke dikha ke tur ko jin ne jala diya

aai qayamat un ne jo parda uTha diya

us fitne ko jaga ke pasheman hui nasim

kya kya 'aziz logon ko un ne sula diya

ab bhi dimagh-e-rafta hamara hai 'arsh par

go aasman ne KHak mein hum ko mila diya

jaani na qadr us guhar shab charagh ki

dil reza-e-KHazaf ki tarah main uTha diya

taqsir jaan dene mein hum ne kabhu na ki

jab tegh wo buland hui sar jhuka diya

garmi charagh ki si nahin wo mizaj mein

ab dil fasurdagi se hun jaise bujha diya

wo aag ho raha hai KHuda jaane ghair ne

meri taraf se us ke tain kya laga diya

itna kaha tha farsh teri rah ke hum hon kash

so tu ne mar mar ke aa kar bichha diya

ab ghaTte ghaTte jaan mein taqat nahin rahi

Tak lag chali saba ki diya sa baDha diya

tangi laga hai karne dam apna bhi har ghaDi

kuDhne ne dil ke ji ko hamare khapa diya

ki chashm tu ne baz ki khola dar-e-sitam

kis muddai KHalq ne tujh ko jaga diya

kya kya ziyan 'mir' ne khinche hain 'ishq mein

dil hath se diya hai juda sar juda diya