rahta hai haDDiyon se meri jo huma laga

rahtā hai haDDiyoñ se mirī jo humā lagā

kuchh dard-e-āshiqī kā use bhī maza lagā

ġhāfil na soz-e-ishq se rah phir kabāb hai

gar lā.ehā us aag kā Tak dil ko jā lagā

dekhā hameñ jahāñ vo tahāñ aag ho gayā

bhaḌkā rakhā hai logoñ ne is ko lagā lagā

mohlat tanik bhī ho to suḳhan kuchh asar kare

maiñ uTh gayā ki ġhair tire kānoñ aa lagā

ab āb-e-chashm hī hai hamārā muhīt-e-ḳhalq

dariyā ko ham ne kab kā kināre rakhā lagā

har-chand us kī teġh-e-sitam thī buland lek

vo taur bad hameñ to qayāmat bhalā lagā

majlis meñ us kī baar na mujh ko milī kabhū

darvāze hī se garche bahut maiñ rahā lagā

bosa laboñ kā māñgte hī muñh bigaḌ gayā

kyā itnī merī baat kā tum ko burā lagā

aalam kī sair 'mīr' kī sohbat meñ ho ga.ī

tāle.a se mere haath ye be-dast-o-pā lagā

rahta hai haDDiyon se meri jo huma laga

kuchh dard-e-ashiqi ka use bhi maza laga

ghafil na soz-e-ishq se rah phir kabab hai

gar laeha us aag ka Tak dil ko ja laga

dekha hamein jahan wo tahan aag ho gaya

bhaDka rakha hai logon ne is ko laga laga

mohlat tanik bhi ho to suKHan kuchh asar kare

main uTh gaya ki ghair tere kanon aa laga

ab aab-e-chashm hi hai hamara muhit-e-KHalq

dariya ko hum ne kab ka kinare rakha laga

har-chand us ki tegh-e-sitam thi buland lek

wo taur bad hamein to qayamat bhala laga

majlis mein us ki bar na mujh ko mili kabhu

darwaze hi se garche bahut main raha laga

bosa labon ka mangte hi munh bigaD gaya

kya itni meri baat ka tum ko bura laga

aalam ki sair 'mir' ki sohbat mein ho gai

talea se mere hath ye be-dast-o-pa laga