kab tak tu imtihan mein mujhse juda rahega

kab tak tū imtihāñ meñ mujh se judā rahegā

jiitā huuñ to tujhī meñ ye dil lagā rahegā

yaañ hijr aur ham meñ bigḌī hai kab kī sohbat

zaḳhm-e-dil-o-namak meñ kab tak maza rahegā

tū barsoñ meñ mile hai yaañ fikr ye rahe hai

jī jā.egā hamārā ik-dam ko yā rahegā

mere na hone kā to hai iztirāb yuuñ hī

aayā hai jī laboñ par ab kyā hai jā rahegā

ġhāfil na rahiyo hargiz nādān dāġh-e-dil se

bhaḌkegā jab ye sho.ala tab ghar jalā rahegā

marne pe apne mat jā sālik talab meñ us kī

go sar ko kho rahegā par us ko pā rahegā

umr-e-azīz saarī dil hī ke ġham meñ guzrī

bīmār āshiqī ye kis din bhalā rahegā

dīdār kā to va.ada mahshar meñ dekh kar kar

bīmār ġham meñ tere tab tak to kyā rahegā

kyā hai jo uTh gayā hai par basta-e-vafā hai

qaid-e-hayāt meñ hai tū 'mīr' aa rahegā

kab tak tu imtihan mein mujh se juda rahega

jita hun to tujhi mein ye dil laga rahega

yan hijr aur hum mein bigDi hai kab ki sohbat

zaKHm-e-dil-o-namak mein kab tak maza rahega

tu barson mein mile hai yan fikr ye rahe hai

ji jaega hamara ik-dam ko ya rahega

mere na hone ka to hai iztirab yun hi

aaya hai ji labon par ab kya hai ja rahega

ghafil na rahiyo hargiz nadan dagh-e-dil se

bhaDkega jab ye shoala tab ghar jala rahega

marne pe apne mat ja salik talab mein us ki

go sar ko kho rahega par us ko pa rahega

umr-e-aziz sari dil hi ke gham mein guzri

bimar aashiqi ye kis din bhala rahega

didar ka to wada mahshar mein dekh kar kar

bimar gham mein tere tab tak to kya rahega

kya hai jo uTh gaya hai par basta-e-wafa hai

qaid-e-hayat mein hai tu 'mir' aa rahega