bhala hoga kuchh ek ahwal us se ya bura hoga

bhalā hogā kuchh ik ahvāl us se yā burā hogā

ma.aal apnā tire ġham meñ ḳhudā jaane ki kyā hogā

tafahhus fā.eda nāseh tadāruk tujh se kyā hogā

vahī pāvegā merā dard-e-dil jis kā lagā hogā

kaso ko shauq yārab besh us se aur kyā hogā

qalam haath aa ga.ī hogī to sau sau ḳhat likhā hogā

dukāneñ husn kī aage tire taḳhta huī hoñgī

jo tū bāzār meñ hogā to yūsuf kab bikā hogā

ma.īshat ham faqīroñ kī sī iḳhvān-e-zamāñ se kar

koī gaalī bhī de to kah bhalā bhaa.ī bhalā hogā

ḳhayāl us bevafā kā ham-nashīñ itnā nahīñ achchhā

gumāñ rakhte the ham bhī ye ki ham se āshnā hogā

qayāmat kar ke ab ta.abīr jis ko kartī hai ḳhilqat

vo us kūche meñ ik āshob sā shāyad huā hogā

ajab kyā hai halāk ishq meñ farhād-o-majnūñ ke

mohabbat rog hai koī ki kam us se jiyā hogā

na ho kyuuñ ġhairat-e-gul-zār vo kūcha ḳhudā jaane

lahū is ḳhaak par kin kin azīzoñ kā girā hogā

bahut ham-sā.e is gulshan ke zanjīrī rahā huuñ maiñ

kabhū tum ne bhī merā shor nāloñ kā sunā hogā

nahīñ juz arsh jaagā raah meñ lene ko dam us ke

qafas se tan ke murġh-e-rūh merā jab rahā hogā

kahīñ haiñ 'mīr' ko maarā gayā shab us ke kūche meñ

kahīñ vahshat meñ shāyad baiThe baiThe uTh gayā hogā

bhala hoga kuchh ek ahwal us se ya bura hoga

maal apna tere gham mein KHuda jaane ki kya hoga

tafahhus faeda naseh tadaruk tujh se kya hoga

wahi pawega mera dard-e-dil jis ka laga hoga

kaso ko shauq yarab besh us se aur kya hoga

qalam hath aa gai hogi to sau sau KHat likha hoga

dukanen husn ki aage tere taKHta hui hongi

jo tu bazar mein hoga to yusuf kab bika hoga

maishat hum faqiron ki si iKHwan-e-zaman se kar

koi gali bhi de to kah bhala bhai bhala hoga

KHayal us bewafa ka ham-nashin itna nahin achchha

guman rakhte the hum bhi ye ki hum se aashna hoga

qayamat kar ke ab tabir jis ko karti hai KHilqat

wo us kuche mein ek aashob sa shayad hua hoga

ajab kya hai halak ishq mein farhad-o-majnun ke

mohabbat rog hai koi ki kam us se jiya hoga

na ho kyun ghairat-e-gul-zar wo kucha KHuda jaane

lahu is KHak par kin kin azizon ka gira hoga

bahut ham-sae is gulshan ke zanjiri raha hun main

kabhu tum ne bhi mera shor nalon ka suna hoga

nahin juz arsh jaga rah mein lene ko dam us ke

qafas se tan ke murgh-e-ruh mera jab raha hoga

kahin hain 'mir' ko mara gaya shab us ke kuche mein

kahin wahshat mein shayad baiThe baiThe uTh gaya hoga