dair-o-haram se guzre ab dil hai ghar hamara

dair-o-haram se guzre ab dil hai ghar hamārā

hai ḳhatm is aable par sair-o-safar hamārā

palkoñ se terī ham ko kyā chashm-dāsht ye thī

in barchhiyoñ ne bāñTā bāham jigar hamārā

duniyā-o-dīñ kī jānib mailān ho to kahiye

kyā jāniye ki us bin dil hai kidhar hamārā

haiñ tere aa.ine kī timsāl ham na pūchho

is dasht meñ nahīñ hai paidā asar hamārā

juuñ sub.h ab kahāñ hai tūl-e-suḳhan kī fursat

qissa hī koī dam ko hai muḳhtasar hamārā

kūche meñ us ke jā kar bantā nahīñ phir aanā

ḳhuun ek din giregā us ḳhaak par hamārā

hai tīra-roz apnā laḌkoñ kī dostī se

is din hī ko kahe thā aksar pidar hamārā

sailāb har taraf se ā.eñge bādiye meñ

juuñ abr rote hogā jis dam guzar hamārā

nashv-o-numā hai apnī juuñ gard-bād anokhī

bālīda ḳhāk-e-rah se hai ye shajar hamārā

yuuñ duur se khaḌe ho kyā mo'tabar hai ronā

dāman se bāñdh dāman ai abr-e-tar hamārā

jab paas raat rahnā aatā hai yaad us kā

thamtā nahīñ hai ronā do dopahar hamārā

is kārvāñ-sarā meñ kyā 'mīr' baar kholeñ

yaañ kuuch lag rahā hai shām-o-sahar hamārā

dair-o-haram se guzre ab dil hai ghar hamara

hai KHatm is aable par sair-o-safar hamara

palkon se teri hum ko kya chashm-dasht ye thi

in barchhiyon ne banTa baham jigar hamara

duniya-o-din ki jaanib mailan ho to kahiye

kya jaaniye ki us bin dil hai kidhar hamara

hain tere aaine ki timsal hum na puchho

is dasht mein nahin hai paida asar hamara

jun subh ab kahan hai tul-e-suKHan ki fursat

qissa hi koi dam ko hai muKHtasar hamara

kuche mein us ke ja kar banta nahin phir aana

KHun ek din girega us KHak par hamara

hai tira-roz apna laDkon ki dosti se

is din hi ko kahe tha aksar pidar hamara

sailab har taraf se aaenge baadiye mein

jun abr rote hoga jis dam guzar hamara

nashw-o-numa hai apni jun gard-baad anokhi

baalida KHak-e-rah se hai ye shajar hamara

yun dur se khaDe ho kya mo'tabar hai rona

daman se bandh daman ai abr-e-tar hamara

jab pas raat rahna aata hai yaad us ka

thamta nahin hai rona do dopahar hamara

is karwan-sara mein kya 'mir' bar kholen

yan kuch lag raha hai sham-o-sahar hamara