mera afsana-e-hasti adhura likh diya jae

mirā afsāna-e-hastī adhūrā likh diyā jaa.e

mirī taqdīr ke ḳhāne meñ tanhā likh diyā jaa.e

hujūm-e-yās meñ jiine kā fan to mujh ko aatā hai

jo hai imroz un ko merā fardā likh diyā jaa.e

hameñ be-mehrī-e-ahbāb ne ye din dikhā.e haiñ

jo pūchhe hāl-e-dil us ko shanāsā likh diyā jaa.e

na.e māhaul meñ āsāñ nahīñ hai zindagī karnā

ise to pyaas kā ik saḳht sahrā likh diyā jaa.e

hamārā naam bhī ho zindagī par marne vāloñ meñ

hamāre sar meñ bhī jiine kā saudā likh diyā jaa.e

yahī sargoshiyāñ kartī hai aksar maslahat-bīnī

shab-e-tārīk ko bhī ab saverā likh diyā jaa.e

guzārish hai yahī 'mehdī' har ik haq-go muarriḳh se

samundar ko bhī 'asr-e-nau meñ pyāsā likh dayā jaa.e

mera afsana-e-hasti adhura likh diya jae

meri taqdir ke KHane mein tanha likh diya jae

hujum-e-yas mein jine ka fan to mujh ko aata hai

jo hai imroz un ko mera farda likh diya jae

hamein be-mehri-e-ahbab ne ye din dikhae hain

jo puchhe haal-e-dil us ko shanasa likh diya jae

nae mahaul mein aasan nahin hai zindagi karna

ise to pyas ka ek saKHt sahra likh diya jae

hamara nam bhi ho zindagi par marne walon mein

hamare sar mein bhi jine ka sauda likh diya jae

yahi sargoshiyan karti hai aksar maslahat-bini

shab-e-tarik ko bhi ab sawera likh diya jae

guzarish hai yahi 'mehdi' har ek haq-go muarriKH se

samundar ko bhi 'asr-e-nau mein pyasa likh daya jae