mera badan hai magar mujhse ajnabi hai abhi

mirā badan hai magar mujh se ajnabī hai abhī

mire ḳhayāl se mujh meñ koī kamī hai abhī

sahar sahar na pukāro dubak ke so jaao

tumhāre hisse kī shab to bahut paḌī hai abhī

na pūchho kaise huiiñ Dher ghar kī dīvāreñ

vo ik sadā usī malbe meñ ghūmtī hai abhī

vo jis kī lahroñ ne sadiyoñ kā farq Daal diyā

hamāre beach meñ haa.il vahī nadī hai abhī

maiñ thak gayā huuñ mujhe ek lamha sone do

maiñ jāntā huuñ ki manzil bahut paḌī hai abhī

maiñ us ke vāste sūraj kahāñ se āḳhir lā.ūñ

na jaane raat mujhe kyā samajh rahī hai abhī

na jaane kab se safar meñ thī us ko mat chheḌo

ye gard mere badan par zarā jamī hai abhī

vo maiñ nahīñ thā vo merī sadā thī galiyoñ meñ

ki mere paañv meñ zanjīr to paḌī hai abhī

na jaane vaqt kab album sameT le apnā

ye tez tez havā yuuñ to chal rahī hai abhī

mera badan hai magar mujh se ajnabi hai abhi

mere KHayal se mujh mein koi kami hai abhi

sahar sahar na pukaro dubak ke so jao

tumhaare hisse ki shab to bahut paDi hai abhi

na puchho kaise huin Dher ghar ki diwaren

wo ek sada usi malbe mein ghumti hai abhi

wo jis ki lahron ne sadiyon ka farq Dal diya

hamare beach mein hail wahi nadi hai abhi

main thak gaya hun mujhe ek lamha sone do

main jaanta hun ki manzil bahut paDi hai abhi

main us ke waste suraj kahan se aaKHir laun

na jaane raat mujhe kya samajh rahi hai abhi

na jaane kab se safar mein thi us ko mat chheDo

ye gard mere badan par zara jami hai abhi

wo main nahin tha wo meri sada thi galiyon mein

ki mere panw mein zanjir to paDi hai abhi

na jaane waqt kab album sameT le apna

ye tez tez hawa yun to chal rahi hai abhi