mera bikharna pas-e-jism-o-jaan nahin dekha

mirā bikharnā pas-e-jism-o-jāñ nahīñ dekhā

kisī ne jalte diye kā dhuāñ nahīñ dekhā

kuchh itnā jhuk ke chale ham lihāz-e-duniyā meñ

zamīñ hī dekhī kabhī āsmāñ nahīñ dekhā

kabhī vo aañkh meñ hai to kabhī hai aañsū meñ

kahīñ bhī ham ne use be-makāñ nahīñ dekhā

dayār-e-ġhair meñ ik shaḳhs se kahā maiñ ne

na dekhā kuchh bhī jo hindostāñ nahīñ dekhā

tamāzatoñ se jise sābiqa thā ham ne use

shajar ke saa.e meñ bhī shādmāñ nahīñ dekhā

mirā hī ashk pilāte ho mujh ko mahfil meñ

tumhāre jaisā koī mezbāñ nahīñ dekhā

use ho lafz kā irfān kis tarah 'abbād'

ki jis ne lafz kā ātish-fishāñ nahīñ dekhā

mera bikharna pas-e-jism-o-jaan nahin dekha

kisi ne jalte diye ka dhuan nahin dekha

kuchh itna jhuk ke chale hum lihaz-e-duniya mein

zamin hi dekhi kabhi aasman nahin dekha

kabhi wo aankh mein hai to kabhi hai aansu mein

kahin bhi hum ne use be-makan nahin dekha

dayar-e-ghair mein ek shaKHs se kaha main ne

na dekha kuchh bhi jo hindostan nahin dekha

tamazaton se jise sabiqa tha hum ne use

shajar ke sae mein bhi shadman nahin dekha

mera hi ashk pilate ho mujh ko mahfil mein

tumhaare jaisa koi mezban nahin dekha

use ho lafz ka irfan kis tarah 'abbaad'

ki jis ne lafz ka aatish-fishan nahin dekha