مرا بکھرنا پس جسم و جاں نہیں دیکھا

مرا بکھرنا پس جسم و جاں نہیں دیکھا

کسی نے جلتے دیے کا دھواں نہیں دیکھا

کچھ اتنا جھک کے چلے ہم لحاظ دنیا میں

زمیں ہی دیکھی کبھی آسماں نہیں دیکھا

کبھی وہ آنکھ میں ہے تو کبھی ہے آنسو میں

کہیں بھی ہم نے اسے بے مکاں نہیں دیکھا

دیار غیر میں اک شخص سے کہا میں نے

نہ دیکھا کچھ بھی جو ہندوستاں نہیں دیکھا

تمازتوں سے جسے سابقہ تھا ہم نے اسے

شجر کے سائے میں بھی شادماں نہیں دیکھا

مرا ہی اشک پلاتے ہو مجھ کو محفل میں

تمہارے جیسا کوئی میزباں نہیں دیکھا

اسے ہو لفظ کا عرفان کس طرح عبادؔ

کہ جس نے لفظ کا آتش فشاں نہیں دیکھا