mera dard-e-dil hai rawan-dawan mera zaKHm-e-dil bhi gulab hai

mirā dard-e-dil hai ravāñ-davāñ mirā zaḳhm-e-dil bhī gulāb hai

mirī ḳhushbuoñ sī hai dāstāñ ye jahān merī kitāb hai

maiñ qalam kā ek sipāhī huuñ mirī zehniyat meñ hai shā.irī

jahāñ fikr kī hai bulandiyāñ mirā harf harf vo baab hai

kabhī mere dil meñ tū dekhnā ki jahāñ tamām simaT ga.e

kare zikr jis kā har ik zabāñ mire dard kā vo shabāb hai

tujhe saath kaise maiñ le chalūñ maiñ safar pe huuñ kisī tuur ke

tire saath chaltī haiñ mastiyāñ tirī chaal mauj-e-chanāb hai

mire bāl-o-par meñ vo hausla hai jo āsmāñ ko sameT le

jo mujhe banā.egā jāvedāñ mirī chashm-e-tar meñ vo ḳhvāb hai

mujhe le ke chalnā hai le ke chal par use bhī le le tū saath meñ

mujhe kar na pā.egā tū bayāñ maiñ savāl huuñ vo javāb hai

maiñ nashe meñ tere hī chuur huuñ tire paas ho ke bhī duur huuñ

tū mire vajūd meñ hai nihāñ tirā ġham hī merī sharāb hai

ye nujūm-o-shams-o-qamar sabhī meñ jo raushnī hai mujhī se hai

mirā qarz-dār hai āsmāñ mire zaḳhmoñ hī kī vo taab hai

maiñ ne sarf kar dī hai zindagī tirī manziloñ kī talāsh meñ

tujhe DhūñDhtā na phirā kahāñ mire ishq kā tū sarāb hai

mera dard-e-dil hai rawan-dawan mera zaKHm-e-dil bhi gulab hai

meri KHushbuon si hai dastan ye jahan meri kitab hai

main qalam ka ek sipahi hun meri zehniyat mein hai shairi

jahan fikr ki hai bulandiyan mera harf harf wo bab hai

kabhi mere dil mein tu dekhna ki jahan tamam simaT gae

kare zikr jis ka har ek zaban mere dard ka wo shabab hai

tujhe sath kaise main le chalun main safar pe hun kisi tur ke

tere sath chalti hain mastiyan teri chaal mauj-e-chanab hai

mere baal-o-par mein wo hausla hai jo aasman ko sameT le

jo mujhe banaega jawedan meri chashm-e-tar mein wo KHwab hai

mujhe le ke chalna hai le ke chal par use bhi le le tu sath mein

mujhe kar na paega tu bayan main sawal hun wo jawab hai

main nashe mein tere hi chur hun tere pas ho ke bhi dur hun

tu mere wajud mein hai nihan tera gham hi meri sharab hai

ye nujum-o-shams-o-qamar sabhi mein jo raushni hai mujhi se hai

mera qarz-dar hai aasman mere zaKHmon hi ki wo tab hai

main ne sarf kar di hai zindagi teri manzilon ki talash mein

tujhe DhunDhta na phira kahan mere ishq ka tu sarab hai