mera dil hai mere dil mein koi aakar nihan kyon ho

mirā dil hai mire dil meñ koī aakar nihāñ kyoñ ho

ye merī sarguzisht-e-ġham kisī kī dāstāñ kyoñ ho

kalīsā mulk-e-rāhib hai haram jāgīr mullā kī

batā zāhid tū hī phir sajda-e-mastī yahāñ kyoñ ho

kisī kī yaad se vābasta jab ye zindagī Thahrī

to phir ai chārāgar achchhā mirā dard-e-nihāñ kyoñ ho

yahī jalva to hai maqsūd merī āfrīnash kā

mohabbat merī qismat hai nasīb-e-dushmanāñ kyoñ ho

harīm-e-ḳhās tak azm-e-rasā hai bāryāb apnā

nazar merī muhīt-e-arsa-e-kaun-o-makāñ kyoñ ho

mirī har saañs hai pāband-e-taslīm-o-razā hamdam

ġharaz kyā hai ki maiñ un se kahūñ tum bad-gumāñ kyoñ ho

maiñ jab huuñ aaj sarshār-e-mai-e-jām-e-tan-āsānī

ye musht-e-ḳhāk ai 'zamzam' ham-āhang-e-fuġhāñ kyoñ ho

mera dil hai mere dil mein koi aakar nihan kyon ho

ye meri sarguzisht-e-gham kisi ki dastan kyon ho

kalisa mulk-e-rahib hai haram jagir mulla ki

bata zahid tu hi phir sajda-e-masti yahan kyon ho

kisi ki yaad se wabasta jab ye zindagi Thahri

to phir ai chaaragar achchha mera dard-e-nihan kyon ho

yahi jalwa to hai maqsud meri aafrinash ka

mohabbat meri qismat hai nasib-e-dushmanan kyon ho

harim-e-KHas tak azm-e-rasa hai baryab apna

nazar meri muhit-e-arsa-e-kaun-o-makan kyon ho

meri har sans hai paband-e-taslim-o-raza hamdam

gharaz kya hai ki main un se kahun tum bad-guman kyon ho

main jab hun aaj sarshaar-e-mai-e-jam-e-tan-asani

ye musht-e-KHak ai 'zamzam' ham-ahang-e-fughan kyon ho