mera dil sang-dil ne dil ka arman ban ke luTa hai

mirā dil sañg-dil ne dil kā armāñ ban ke luuTā hai

ġhazab hai ḳhāna-e-ulfat ko mehmāñ ban ke luuTā hai

kiyā andher zālim ne bujhā kar sham-e-ulfat ko

umīdoñ kī sahar ko shām-e-hijrāñ ban ke luuTā hai

jhalak dikhlā ke jis ne niiñd āñkhoñ kī uḌaa.ī thī

usī ne naqd-e-dil ḳhvāb-e-pareshāñ ban ke luuTā hai

zabān-e-ishq meñ jis ko kaheñge dushman-e-īmāñ

usī paimāñ-shikan ne rūh-e-īmāñ ban ke luuTā hai

zabān-e-shauq par rakh rakh ke ilzām-e-suḳhan-sāzī

but-e-ḳhāmosh ne mujh ko zabān-dāñ ban ke luuTā hai

maiñ jis ko manzil-e-maqsūd kā rahbar samajhtā thā

usī be-dard ne mujh ko nigahbāñ ban ke lauTā hai

kiyā mujh ko shikār-e-kufr le kar aaḌ īmāñ kī

kisī kāfir ne ai 'nāzish' musalmāñ ban ke luuTā hai

mera dil sang-dil ne dil ka arman ban ke luTa hai

ghazab hai KHana-e-ulfat ko mehman ban ke luTa hai

kiya andher zalim ne bujha kar sham-e-ulfat ko

umidon ki sahar ko sham-e-hijran ban ke luTa hai

jhalak dikhla ke jis ne nind aankhon ki uDai thi

usi ne naqd-e-dil KHwab-e-pareshan ban ke luTa hai

zaban-e-ishq mein jis ko kahenge dushman-e-iman

usi paiman-shikan ne ruh-e-iman ban ke luTa hai

zaban-e-shauq par rakh rakh ke ilzam-e-suKHan-sazi

but-e-KHamosh ne mujh ko zaban-dan ban ke luTa hai

main jis ko manzil-e-maqsud ka rahbar samajhta tha

usi be-dard ne mujh ko nigahban ban ke lauTa hai

kiya mujh ko shikar-e-kufr le kar aaD iman ki

kisi kafir ne ai 'nazish' musalman ban ke luTa hai