mera haal mujhse na puchhiye ki main gham se sina-figar hun

mirā haal mujh se na pūchhiye ki maiñ ġham se sīna-figār huuñ

jise āsmāñ ne jalā diyā usī kārvāñ kā ġhubār huuñ

jahāñ jal rahā thā kabhī diyā jahāñ sadqe hotī thī kahkashāñ

jise koī dekh ke ro paḌe maiñ vahī to sang-e-mazār huuñ

ye bahār aur ye gulsitāñ mirī tishnagī ke harīf haiñ

mujhe bijliyoñ kī talāsh hai ki maiñ dil-jaloñ kī pukār huuñ

yahī raas aa.ī hai dostī ki fasāna ban ga.ī zindagī

tire ek ġham kā sila hai ye ki hazār ġham se do-chār huuñ

mirī qabr un kī galī meñ ho mirā muñh nahīñ hai ye dosto

kahīñ Daal do mirī laash ko ki maiñ nang-e-kūcha-e-yār huuñ

maiñ falak kī aañkh kā nuur huuñ maiñ kisī kā husn-e-ġhurūr huuñ

maiñ fareb-e-ishq kī aabrū maiñ mohabbatoñ kā qarār huuñ

mirī TuuTī aas bañdhā.e kaun mirā dard pūchhne aa.e kaun

jise tū ne dar se uThā diyā maiñ vahī to 'nāzish'-e-zār huuñ

mera haal mujh se na puchhiye ki main gham se sina-figar hun

jise aasman ne jala diya usi karwan ka ghubar hun

jahan jal raha tha kabhi diya jahan sadqe hoti thi kahkashan

jise koi dekh ke ro paDe main wahi to sang-e-mazar hun

ye bahaar aur ye gulsitan meri tishnagi ke harif hain

mujhe bijliyon ki talash hai ki main dil-jalon ki pukar hun

yahi ras aai hai dosti ki fasana ban gai zindagi

tere ek gham ka sila hai ye ki hazar gham se do-chaar hun

meri qabr un ki gali mein ho mera munh nahin hai ye dosto

kahin Dal do meri lash ko ki main nang-e-kucha-e-yar hun

main falak ki aankh ka nur hun main kisi ka husn-e-ghurur hun

main fareb-e-ishq ki aabru main mohabbaton ka qarar hun

meri TuTi aas bandhae kaun mera dard puchhne aae kaun

jise tu ne dar se uTha diya main wahi to 'nazish'-e-zar hun