mera hi naqsh-e-kaf-e-pa dikhai deta hai

mirā hī naqsh-e-kaf-e-pā dikhā.ī detā hai

tire nagar kā ye rasta dikhā.ī detā hai

mire qarīb se guzrī hai bārhā duniyā

bahut udaas hai aisā dikhā.ī detā hai

vo tishna-lab huuñ ki jis ko hai justujū-e-sarāb

mirī talāsh meñ dariyā dikhā.ī detā hai

nigal liyā hai mujhe vaqt ke taqāzoñ ne

mirā vajūd to parda dikhā.ī detā hai

yahāñ sunā hai samandar thā kuchh dinoñ pahle

ab ek ḳhaak kā sahrā dikhā.ī detā hai

diye haiñ zaḳhm zamāne ne saiñkaḌoñ 'sīrat'

diyā jo us ne vo tanhā dikhā.ī detā hai

mera hi naqsh-e-kaf-e-pa dikhai deta hai

tere nagar ka ye rasta dikhai deta hai

mere qarib se guzri hai barha duniya

bahut udas hai aisa dikhai deta hai

wo tishna-lab hun ki jis ko hai justuju-e-sarab

meri talash mein dariya dikhai deta hai

nigal liya hai mujhe waqt ke taqazon ne

mera wajud to parda dikhai deta hai

yahan suna hai samandar tha kuchh dinon pahle

ab ek KHak ka sahra dikhai deta hai

diye hain zaKHm zamane ne sainkaDon 'sirat'

diya jo us ne wo tanha dikhai deta hai