mera husn-e-takallum mere andaz-e-bayan tak hai

mirā husn-e-takallum mere andāz-e-bayāñ tak hai

tumhārī dāstāñ kā rang merī dāstāñ tak hai

haqīqat kī nigāhoñ se jo dekheñ dekhne vaale

to har aañsū baġhair alfāz kī ek dāstāñ tak hai

phir us ke baa'd maiñ ḳhud maut ko āvāz de lūñgā

mujhe jiine kī hasrat bas tumhāre āstāñ tak hai

mohabbat ne vo dāman de diyā hai mere hāthoñ meñ

ki vus.at jis ke andar vus.at-e-kaun-o-makāñ tak hai

zamīñ se āsmāñ tak hai rasā.ī merī aahoñ kī

abhī to har shikāyat bāġhbāñ kī bāġhbāñ tak hai

mirī jānib se jā kar aap us maġhrūr se kah deñ

tirī manzil zamīñ tak merī manzil āsmāñ tak hai

mirī mashq-e-suḳhan jaadū samo detī hai sheroñ meñ

ġhazal kī shaan ai 'shākir' mire husn-e-bayāñ tak hai

mera husn-e-takallum mere andaz-e-bayan tak hai

tumhaari dastan ka rang meri dastan tak hai

haqiqat ki nigahon se jo dekhen dekhne wale

to har aansu baghair alfaz ki ek dastan tak hai

phir us ke ba'd main KHud maut ko aawaz de lunga

mujhe jine ki hasrat bas tumhaare aastan tak hai

mohabbat ne wo daman de diya hai mere hathon mein

ki wusat jis ke andar wusat-e-kaun-o-makan tak hai

zamin se aasman tak hai rasai meri aahon ki

abhi to har shikayat baghban ki baghban tak hai

meri jaanib se ja kar aap us maghrur se kah den

teri manzil zamin tak meri manzil aasman tak hai

meri mashq-e-suKHan jadu samo deti hai sheron mein

ghazal ki shan ai 'shakir' mere husn-e-bayan tak hai