mera jiwan hai KHud meri kahani se bhi aage ka

mirā jīvan hai ḳhud merī kahānī se bhī aage kā

fasāna huuñ hayāt-e-jāvedānī se bhī aage kā

zamīñ kī qaid se ab tak rihā.ī mil nahīñ paa.ī

safar rakkhā hai saqf-e-āsmānī se bhī aage kā

na jaane kyā huā ki phir koī basne nahīñ paayā

ye dil hai ik makāñ terī nishānī se bhī aage kā

kisī kī maut bhī matrūk kar saktī nahīñ is ko

mohabbat silsila hai zindagānī se bhī aage kā

ḳhamoshī kī zabāñ kā tarjuma bhī ho rahā hotā

agar iblāġh hotā tarjumānī se bhī aage kā

bahut se qarz haiñ andoh-e-insānī ke bhī tum par

kabhī sochā karo soz-e-nihānī se bhī aage kā

tumhārī call aatī hai to sab kuchh bhuul jaatā huuñ

nasha rahtā hai shām-e-arġhavānī se bhī aage kā

paroñ meñ bāñdh rakkhī hai masāfat ḳhud ko paane kī

irāda hai falak kī mehmānī se bhī aage kā

'zafar' hadd-e-nazar tak kī basārat kā fusūñ toḌo

tumheñ to sochnā hai lā-makānī se bhī aage kā

mera jiwan hai KHud meri kahani se bhi aage ka

fasana hun hayat-e-jawedani se bhi aage ka

zamin ki qaid se ab tak rihai mil nahin pai

safar rakkha hai saqf-e-asmani se bhi aage ka

na jaane kya hua ki phir koi basne nahin paya

ye dil hai ek makan teri nishani se bhi aage ka

kisi ki maut bhi matruk kar sakti nahin is ko

mohabbat silsila hai zindagani se bhi aage ka

KHamoshi ki zaban ka tarjuma bhi ho raha hota

agar iblagh hota tarjumani se bhi aage ka

bahut se qarz hain andoh-e-insani ke bhi tum par

kabhi socha karo soz-e-nihani se bhi aage ka

tumhaari call aati hai to sab kuchh bhul jata hun

nasha rahta hai sham-e-arghawani se bhi aage ka

paron mein bandh rakkhi hai masafat KHud ko pane ki

irada hai falak ki mehmani se bhi aage ka

'zafar' hadd-e-nazar tak ki basarat ka fusun toDo

tumhein to sochna hai la-makani se bhi aage ka