mera lahja churana maut ka saman kar lena

mirā lahja churānā maut kā sāmān kar lenā

yahī zād-e-safar hai to safar āsān kar lenā

talab ke jaal meñ uljhā huā dil kab samajhtā hai

na.ī dozaḳh ugānā chhāñv kā armān kar lenā

bharosa eḌiyāñ ragḌe na koī aas dam toḌe

vafā kā naam bhī lenā to duniyā chhān kar lenā

zamāna be-gharī ke naam par dushnām likhtā hai

havā ke dastaḳhat bhī ab to ḳhema taan kar lenā

kahīñ resham kī Dorī maut kā phandā na ban jaa.e

duā bhī āj-kal baabā nazar pahchān kar lenā

nazar kahtī rahī gulshan bhī ab dastār-dushman hai

ḳhabar bantā rahā nuqsān par nuqsān kar lenā

nayā lahja nayā chehra nayā fashion nahīñ hotā

mukhauTā pheñknā ḳhud par baḌā ehsān kar lenā

mera lahja churana maut ka saman kar lena

yahi zad-e-safar hai to safar aasan kar lena

talab ke jal mein uljha hua dil kab samajhta hai

nai dozaKH ugana chhanw ka arman kar lena

bharosa eDiyan ragDe na koi aas dam toDe

wafa ka nam bhi lena to duniya chhan kar lena

zamana be-ghari ke nam par dushnam likhta hai

hawa ke dastaKHat bhi ab to KHema tan kar lena

kahin resham ki Dori maut ka phanda na ban jae

dua bhi aaj-kal baba nazar pahchan kar lena

nazar kahti rahi gulshan bhi ab dastar-dushman hai

KHabar banta raha nuqsan par nuqsan kar lena

naya lahja naya chehra naya fashion nahin hota

mukhauTa phenkna KHud par baDa ehsan kar lena