mera panw zer-e-zamin hai pas-e-asman mera hath hai

mirā paañv zer-e-zamīn hai pas-e-āsmāñ mirā haath hai

kahīñ beach meñ mirā jism hai kahīñ darmiyāñ mirā haath hai

ye nujūm haiñ mirī uñgliyāñ ye ufuq haiñ merī hatheliyāñ

mirī por por hai raushnī kaf-e-kahkashāñ mirā haath hai

mire jabr meñ haiñ latāfateñ mirī qadr meñ haiñ kasāfateñ

kabhī ḳhāliq-e-shab-e-tār hai kabhī zau-fishāñ mirā haath hai

kisī bahr-e-ḳhvāb kī sat.h par mujhe tairnā hai tamām shab

mirī aañkh kashtī-e-jism hai mirā bādbāñ mirā haath hai

abhī harf lams-e-visāl ke kisī mantaqe pe rukā nahīñ

abhī guñg merā vajūd hai abhī be-zabāñ mirā haath hai

mera panw zer-e-zamin hai pas-e-asman mera hath hai

kahin beach mein mera jism hai kahin darmiyan mera hath hai

ye nujum hain meri ungliyan ye ufuq hain meri hatheliyan

meri por por hai raushni kaf-e-kahkashan mera hath hai

mere jabr mein hain latafaten meri qadr mein hain kasafaten

kabhi KHaliq-e-shab-e-tar hai kabhi zau-fishan mera hath hai

kisi bahr-e-KHwab ki sath par mujhe tairna hai tamam shab

meri aankh kashti-e-jism hai mera baadban mera hath hai

abhi harf lams-e-visal ke kisi mantaqe pe ruka nahin

abhi gung mera wajud hai abhi be-zaban mera hath hai