mera shikwa har ek sohbat mein subh-o-sham karte hain

mirā shikva har ik sohbat meñ sub.h-o-shām karte haiñ

ḳhudā jaane mujhe itnā vo kyoñ badnām karte haiñ

gila un kī jafāoñ kā jo sub.h-o-shām karte haiñ

tirā shikva bhī vo ai gardish-e-ayyām karte haiñ

sahar hote hī ham yakjā subū-o-jām karte haiñ

savere hī se dūr-andesh fikr-e-shām karte haiñ

mohabbat mahz rusvā.ī hai ai dil soch le is ko

baḌī mushkil se paidā log apnā naam karte haiñ

kisī se ham-suḳhan hotā nahīñ mahfil meñ parvāna

unheñ bāteñ nahīñ ātīñ jo apnā kaam karte haiñ

hamīñ ko kyoñ banāyā taḳhta-e-mashq-e-sitam tum ne

tumhāre ishq kā da.avā to ḳhās-o-ām karte haiñ

baḌe nādān haiñ jin ko hai ummīd-e-karam tujh se

jo aaqil haiñ vo kab aisā ḳhayāl-e-ḳhām karte haiñ

rahī umr-e-ravāñ garm-e-safar shab ko bhī ai 'sāhir'

jinheñ hai fikr manzil kī vo kab ārām karte haiñ

mera shikwa har ek sohbat mein subh-o-sham karte hain

KHuda jaane mujhe itna wo kyon badnam karte hain

gila un ki jafaon ka jo subh-o-sham karte hain

tera shikwa bhi wo ai gardish-e-ayyam karte hain

sahar hote hi hum yakja subu-o-jam karte hain

sawere hi se dur-andesh fikr-e-sham karte hain

mohabbat mahz ruswai hai ai dil soch le is ko

baDi mushkil se paida log apna nam karte hain

kisi se ham-suKHan hota nahin mahfil mein parwana

unhen baaten nahin aatin jo apna kaam karte hain

hamin ko kyon banaya taKHta-e-mashq-e-sitam tum ne

tumhaare ishq ka dawa to KHas-o-am karte hain

baDe nadan hain jin ko hai ummid-e-karam tujh se

jo aaqil hain wo kab aisa KHayal-e-KHam karte hain

rahi umr-e-rawan garm-e-safar shab ko bhi ai 'sahir'

jinhen hai fikr manzil ki wo kab aaram karte hain