mera tarz-e-bayan-e-shauq bebakana hota hai

mirā tarz-e-bayān-e-shauq bebākāna hotā hai

amal jo rind se hotā hai vo rindāna hotā hai

mirī rūdād meñ muzmar hai hāl-e-zindagī terā

bayān-e-ishq goyā husn kā afsāna hotā hai

nahīñ miltī hai dam lene kī mohlat sham-e-mahfil ko

idhar parvāna hotā hai udhar parvāna hotā hai

harīf-e-nargis-e-mastāna kyā koī tumhārā ho

jise dīvāna tum karte ho vo dīvāna hotā hai

kabhī rindān-e-mahfil be-piye maḳhmūr hote haiñ

kabhī ye ḳhaas faiz-e-nargis-e-mastāna hotā hai

jab un se zo'm-e-ḳhuddārī meñ khiñch jaatā huuñ kahtī haiñ

ye tarz-e-mīrzāyāna to ma.ashūqāna hotā hai

jab abr-e-mai-kada-bar-dosh sehn-e-bāġh meñ aa.e

usī ko kahte haiñ farzāna jo dīvāna hotā hai

janāb-e-vā.iz-e-rangīñ-bayāñ se koī ye pūchhe

ki kyoñ har va.az meñ zikr-e-mai-o-paimāna hotā hai

maiñ kahne ko to apnī dāstān-e-ishq kahtā huuñ

magar muñh se nikal kar husn kā afsāna hotā hai

mai-e-ummīd se bhar letā huuñ aajiz nahīñ hotā

tahī-dastī meñ jab ḳhālī mirā paimāna hotā hai

baḌhā detā huuñ maiñ ḳhud haath ruktā hai agar saaqī

mirā har fe.al bazm-e-mai meñ be-bākāna hotā hai

abhī jo raaz hai pinhāñ ayaañ ho jā.egā ik din

ki afsūn-e-mohabbat hī to phir afsāna hotā hai

rahī qaid-e-makāñ se mai-kashī āzād 'bedil' kī

jahāñ vo baiTh jaatā hai vahī mai-ḳhāna hotā hai

mera tarz-e-bayan-e-shauq bebakana hota hai

amal jo rind se hota hai wo rindana hota hai

meri rudad mein muzmar hai haal-e-zindagi tera

bayan-e-ishq goya husn ka afsana hota hai

nahin milti hai dam lene ki mohlat sham-e-mahfil ko

idhar parwana hota hai udhar parwana hota hai

harif-e-nargis-e-mastana kya koi tumhaara ho

jise diwana tum karte ho wo diwana hota hai

kabhi rindan-e-mahfil be-piye maKHmur hote hain

kabhi ye KHas faiz-e-nargis-e-mastana hota hai

jab un se zo'm-e-KHuddari mein khinch jata hun kahti hain

ye tarz-e-mirzayana to mashuqana hota hai

jab abr-e-mai-kada-bar-dosh sehn-e-bagh mein aae

usi ko kahte hain farzana jo diwana hota hai

janab-e-waiz-e-rangin-bayan se koi ye puchhe

ki kyon har waz mein zikr-e-mai-o-paimana hota hai

main kahne ko to apni dastan-e-ishq kahta hun

magar munh se nikal kar husn ka afsana hota hai

mai-e-ummid se bhar leta hun aajiz nahin hota

tahi-dasti mein jab KHali mera paimana hota hai

baDha deta hun main KHud hath rukta hai agar saqi

mera har feal bazm-e-mai mein be-bakana hota hai

abhi jo raaz hai pinhan ayan ho jaega ek din

ki afsun-e-mohabbat hi to phir afsana hota hai

rahi qaid-e-makan se mai-kashi aazad 'bedil' ki

jahan wo baiTh jata hai wahi mai-KHana hota hai